LG G2 mini smartfoni Toshkentda 900 ming so‘mdan sotila boshladi

O‘zbekistonda Janubiy Koreya kompaniyasining LG G2 mini rusumli smartfoni savdosi boshlandi. Bu haqda Mobinfo.uz xabar berdi.

LG G2 mini yil boshida Mobile World Congress 2014 ko‘rgazmasi arafasida e’lon qilingan edi. Smartfon o‘lchamlari avvalgi LG G2 rusumiga qaraganda ancha  kichraytirilgan va texnik ko‘rsatkichlari ham o‘zgartirilgan bo‘lib, 4,7 dyuym kattalikdagi 960×540 pikselli displey (qHD), 8 megapikselli asosiy va 1,3 megapikselli old kameraga ega. Telefon  Qualcomm Snapdragon 400 protsessorida ishlaydi.

Qurilmaning tezkor xotira sig‘imi 1 Gb ni, ichki xotirasi esa 8 Gb ni tashkil qiladi.  Shuningdek, microSD joylashtirish imkoniyati ham mavjud. Akkumulyatorining sig‘imi 2400 mA/s ga teng. Shu bilan birga, LG G mini’ga ikkita SIM-karta joylashtirish imkoniyati mavjud. Smartfon  Android 4.4 KitKat operatsion tizimida ishlaydi.

Poytaxtning “Fleshka” savdo majmuasida LG G2 mini 900 ming so‘mga sotilmoqda. LG G2 smartfonini esa 1,5 mln so‘mga xarid qilish mumkin.