Vyetnam internet-do‘konlarining birida yangi ikki SIM-kartali Samsung Galaxy Pocket 2 Duos va Galaxy Core 2 Duos smartfonlari haqida ma’lumot paydo bo‘ldi. Ikkala qurilma ham Android 4.4 KitKat OTida ishlaydi. Bu haqda Mail.ru xabar berdi.
Samsung Galaxy Pocket 2 Duos 2012-yilda ishlab chiqarilgan, kompaniyaning eng kichik va eng hamyonbop Galaxy Pocket va 2013-yilda ishlab chiqarilgan Pocket Plus/Neo smartfonlarining davomchisi hisoblanadi. Ushbu smartfonning xususiyatlari judayam oddiy, u 3,2 dyumli 480×320 pikselli TFT-displey, 3G (HSDPA), 512 Mb tezkor, 4 Gb ichki xotira, 2 megapikselli asosiy kameraga ega.
Samsung Galaxy Pocket 2 Duos’ning akkumulyator sig‘imi — 1200 mA/s. Smartfon o‘lchamlari 109,7×60,6×11,7 mm, og‘irligi 110 grammga teng.
Samsung Galaxy Core 2 Duos zamonaviyroq qurilmadir. U 4,5 dyumli 800×480 pikselli displey, to‘rt yadroli protsessor, 768 Mb tezkor va 4 Gb ichki xotiraga ega. Smartfonda 3G tarmog‘ida yuklanishning maksimal tezligi soniyasiga 21 megabitga teng.
Yangi smartfonning 5 megapikselli kamerasi avtofokus va yoritqich bilan ta’minlangan. Qurilma, shuningdek 0,3 megapikselli old kamera, 2000 mA/s sig‘imli akkumulyatorga ega. Smartfonning o‘lchamlari 130,2×67,9×9,8 mm, og‘irligi 138 grammni tashkil etadi.
Yangi Samsung smartfonlarining narxi va savdoga chiqarilish vaqti haqida hech qanday ma’lumot berilmagan.
Izoh (0)