LG G2 mini смартфони Тошкентда 900 минг сўмдан сотила бошлади

Ўзбекистонда Жанубий Корея компаниясининг LG G2 mini русумли смартфони савдоси бошланди. Бу ҳақда Mobinfo.uz хабар берди.

LG G2 mini йил бошида Mobile World Congress 2014 кўргазмаси арафасида эълон қилинган эди. Смартфон ўлчамлари аввалги LG Г2 русумига қараганда анча  кичрайтирилган ва техник кўрсаткичлари ҳам ўзгартирилган бўлиб, 4,7 дюйм катталикдаги 960×540 пикселли дисплей (qHD), 8 мегапикселли асосий ва 1,3 мегапикселли олд камерага эга. Телефон  Qualcomm Snapdragon 400 процессорида ишлайди.

Қурилманинг тезкор хотира сиғими 1 Гб ни, ички хотираси эса 8 Гб ни ташкил қилади.  Шунингдек, microSD жойлаштириш имконияти ҳам мавжуд. Аккумуляторининг сиғими 2400 мА/с га тенг. Шу билан бирга, LG G2 mini’га иккита SIM-карта жойлаштириш имконияти мавжуд. Смартфон  Android 4.4 KitKat операцион тизимида ишлайди.

Пойтахтнинг «Флешка» савдо мажмуасида LG G2 mini 900 минг сўмга сотилмоқда. LG G2 смартфонини эса 1,5 млн сўмга харид қилиш мумкин.