2014-yilgi Toshkent xalqaro sayyohlik yarmarkasida rassom Lekim Ibragimovning “Ming farishta va bir surat” mega-surati namoyish etiladi, deya xabar berdi Gazeta.uz. Bu yilgi “Ipak yo‘lida turizm” 20-yarmarkasi Toshkentda 7—9-oktabr kunlari bo‘lib o‘tadi.
Eslatib o‘tamiz, kartina muallifi – Lekim Ibragimov – rasmlari dunyoning ko‘plab muzeylaridan joy olgan professor, Rossiya Badiiy akademiyasi Faxriy a’zosi, O‘zbekiston Badiiy akademiyasi akademigi, Butunjahon rassomlar syezdi delegati (1998-yil, Parij), O‘zbekiston Xalq rassomidir.
2012-yilda Pragada, 2013-yilda esa Moskva Rastasida (Гостиный Двор) Lekim Ibragimovning “Ming farishta va bir surat” mega-surati namoyish etilgan edi. Ko‘rgazmaning ochilishida Interrecord Ltd. rekordlarni ro‘yxatga olish xalqaro agentligi vakillari qatnashib, “Bir rassom tomonidan bo‘z matoga (xolst) moybo‘yoq bilan chizilgan dunyodagi eng katta kartina” va “Bitta kartinada chizilgan eng ko‘p miqdordagi farishtalar” toifasidagi ikkita jahon rekordi o‘rnatilgan edi.
Muallifning loyihasiga ko‘ra, suratning yakuniy ko‘rinishi mingta alohida rasmlardan iborat bo‘lib, ularning har birida bittadan farishta tasvirlangan. Bunday rasmning o‘lchami – 78 ga 64 sm. Yaxlit rasmning hajmi esa, 500 metr kvadratdan oshiqdir. Kartina va konstruksiya og‘irligi 22 tonnadan iborat. Konstruksiyani montaj qilishga va mega-suratning 1000 ta qismini birlashtirishga to‘rt kun talab qilinadi.
Yig‘ilgan pannoning balandligi 8 metr, uzunligi esa 66 metr bo‘lib, Berlinning mashhur Zafar kolonnasi yoni bilan yotqizilsa, unga teng bo‘ladi.
Izoh (0)