O‘zbekiston Ichki ishlar vazirligi Yo‘l harakati xavfsizligi davlat xizmati avtomobil saloniga faqat monitorsiz videoregistrator o‘rnatish mumkinligi, monitor bo‘lgan taqdirda, u salonning old qismida bo‘lmasligi lozimligi haqida o‘z tavsiyalarini e’lon qildi.
“O‘zbekiston Vazirlar Mahkamasi qarori bilan tasdiqlangan Yo‘l harakati qoidalariga ko‘ra, haydovchiga transport vositasi salonining old qismiga, jumladan, asbob-uskunalar paneli, quyoshdan himoya soyaboni va orqani ko‘rish oynasiga tele-, videomonitorlar o‘rnatish taqiqlanadi”, — deya ushbu masala bo‘yicha qonuniy talablar keltirildi.
Ushbu qoidaga rioya qilinmagan taqdirda eng kam oylik ish haqining ikki barobarida jarima solinadi. Ushbu qonunbuzarlik yil davomida qayta sodir etilsa, eng kam oylik ish haqining uch barobaridan olti barobarigacha jarimaga tortiladi yoki transport vositasini boshqarish huquqidan olti oydan bir yilgacha mahrum qilinadi.
27-may kuni Ichki ishlar vazirligi Yo‘l harakati xavfsizligi bosh boshqarmasi vakillari to‘g‘ridan-to‘g‘ri muloqot chog‘ida fuqarolarning tegishli savollariga javoban O‘zbekistonda avtomobillarga videoregistrator o‘rnatishga ruxsat berilmasligini ma’lum qilgan edi.
Gazeta.uz tomonidan keltirilgan YHXBB vakillarining bunday bayonotlari fuqarolarda ko‘plab savollarni keltirib chiqardi, internetda qizg‘in bahslarga sabab bo‘ldi.
Gap shundaki, videoregistratorlardan foydalanish mumkin emasligiga aniq sabablar keltirilmagan, mavjud qonunlar bilan ham asoslanmagan.
Izoh (0)