Тошкентликлар «Минг фаришта ва бир сурат» мега-суратини кўришади

2014 йилги Тошкент халқаро сайёҳлик ярмаркасида рассом Леким Ибрагимовнинг «Минг фаришта ва бир сурат» мега-сурати намойиш этилади, дея хабар берди Gazeta.uz. Бу йилги «Ипак йўлида туризм» 20-ярмаркаси Тошкентда 7—9 октябрь кунлари бўлиб ўтади.

Эслатиб ўтамиз, картина муаллифи – Леким Ибрагимов – расмлари дунёнинг кўплаб музейларидан жой олган профессор, Россия Бадиий академияси Фахрий аъзоси, Ўзбекистон Бадиий академияси академиги, Бутунжаҳон рассомлар сезди делегати (1998 йил, Париж), Ўзбекистон Халқ рассомидир.

2012 йилда Прагада, 2013 йилда эса Москва Растасида (Гостиный Двор) Леким Ибрагимовнинг «Минг фаришта ва бир сурат» мега-сурати намойиш этилган эди. Кўргазманинг очилишида Interrecord Ltd. рекордларни рўйхатга олиш халқаро агентлиги вакиллари қатнашиб, «Бир рассом томонидан бўз матога (холст) мойбўёқ билан чизилган дунёдаги энг катта картина» ва «Битта картинада чизилган энг кўп миқдордаги фаришталар» тоифасидаги иккита жаҳон рекорди ўрнатилган эди.

Муаллифнинг лойиҳасига кўра, суратнинг якуний кўриниши мингта алоҳида расмлардан иборат бўлиб, уларнинг ҳар бирида биттадан фаришта тасвирланган. Бундай расмнинг ўлчами – 78 га 64 см. Яхлит расмнинг ҳажми эса, 500 метр квадратдан ошиқдир. Картина ва конструкция оғирлиги 22 тоннадан иборат. Конструкцияни монтаж қилишга ва мега-суратнинг 1000 та қисмини бирлаштиришга тўрт кун талаб қилинади.

Йиғилган паннонинг баландлиги 8 метр, узунлиги эса 66 метр бўлиб, Берлиннинг машҳур Зафар колоннаси ёни билан ётқизилса, унга тенг бўлади.