Ўзбекистонда автомобилларга видеорегистратор ўрнатишга рухсат берилмайди. Бу ҳақда 27 май куни Ички ишлар вазирлиги Йўл ҳаракати хавфсизлиги бош бошқармаси вакиллари тўғридан-тўғри мулоқот чоғида маълум қилди, дея хабар берди Gazeta.uz.
Бошқарма вакилларининг таъкидлашича, ҳайдовчини қоидабузарлик учун тўхтатган Йўл ҳаракати хавфсизлиги давлат хизмати ходимини видеога тушириш ҳам мумкин эмас.
«Автомобилга навигатор, видеорегистратор ёки орқани кўриб туриш мақсадида камера ўрнатиш мумкинки?» — деган саволга жавобан «Бизда бундай турдаги қурилма ва ускуналарни ўрнатиш тақиқланган», — дея таъкидланди.
ЙҲХДХ ходимлари видеорегистратор ўрнатилган ҳолатни йўл ҳаракати хавфсизлиги қоидаларининг бузилиши сифатида расмийлаштириш ҳуқуқига эга эканлиги ҳам айтиб ўтилди.
Шу билан бирга таъкидланишича, орқа ўриндиқлар тепа қисмига монитор ўрнатиш мумкин: «Қонун теле- ва видеомониторларни транспорт воситасининг олд қисмига ўрнатишни ман қилади».
Нашрнинг эслатишича, Ўзбекистон Маъмурий кодекси транспорт воситаси салонининг олд қисмига мониторларни ўзбошимчалик билан ўрнатишни тақиқлайди. Қоидабузарлар энг кам ойлик иш ҳақининг икки бараварида жаримага тортилади.
Йўл-транспорт ҳодисаси рўй берган тақдирда видеорегистратордаги ёзув судга далил сифатида қабул қилинадими, йўқми, мазмунидаги саволга ЙҲХДХ вакиллари: «Саволингизга тўлиқ ва аниқ жавоб олиш учун яхшиси, суд органларига мурожаат қилинг», — деб жавоб беришди.
Изоҳ (0)