AQSh Milliy xavfsizlik agentligi Snouden maxfiy kuzatuv qoidalari buzilayotgani haqida shikoyat qilmaganini ta’kidladi

Amerika maxsus xizmati sobiq xodimi Edvard Snouden buning aksini ta’kidlashiga qaramay, o‘z rahbariyatiga razvedka ma’lumotlarini yig‘ish qoidalari buzilayotgani ustidan shikoyat qilmagani ma’lum bo‘ldi. Bunday xulosa Snouden tomonidan idoraning huquqiy bo‘limiga yuborilgan yagona maktub matnidan kelib chiqdi. Bu haqda Associated Press xabar berdi.

28-may kuni Amerikaning NBC telekanaliga bergan intervyusida Snouden idora rahbariyatini Milliy xavfsizlik agentligi o‘z vakolatidan foydalanishida jiddiy muammolar borligi haqida ogohlantirganini ma’lum qildi.

Ertasi kuni AQSh MXA Snoudenning maktubini e’lon qildi, unda agent o‘quv materiallaridagi ba’zi texnik nyuanslarga oydinlik kiritishni so‘ragan.

Oshkor qilingan xat 2013-yil 8-aprelga tegishli bo‘lib, u agent tomonidan qandaydir xavotir bildirilgan yagona murojaatdir. Bundan tashqari, agentlikdagilar idora xodimlaridan hech biriga Snouden bu haqda og‘iz ochmaganini ma’lum qilishgan.

Edvard Snouden bilan bog‘liq mojaro 2013-yil iyunida kelib chiqqan edi. O‘shanda u AQSh maxsus xizmatlari internet va mobil aloqa orqali butun dunyodagi foydalanuvchilarni kuzatib borgani haqidagi maxfiy axborotlarni fosh etgan edi.