Buyuk Britaniya Toni Bler va Jorj Bushning Iroqqa qilingan hujum arafasidagi yozishmalarini fosh qiladi

Britaniya hukumati mamlakat sobiq bosh vaziri Toni Bler va AQSh sobiq prezidenti kichik Jorj Bush o‘rtasida 2003-yilda bo‘lib o‘tgan yozishmalarni fosh qilishga qaror qildi. Ushbu yozishmalar 2003-yil Iroqqa qilingan hujumdan bir necha oy avval olib borilgan, deya xabar berdi “ITAR-TASS”.

Bunda gap 25 ta xat va 130 dan oshiq telefon suhbatlari haqida bormoqda. 2011-yilda Britaniya vazirlar mahkamasi kotibi Gas O’Donnel bunday qadam “Birlashgan Qirollikning xalqaro munosabatlariga zarar yetkazishi”ni ta’kidlab, hujjatlarni oshkor qilishdan bosh tortgan edi.

2009-yilda Britaniya qo‘shinlarining Iroqqa kiritilishi holatini o‘rganish uchun tuzilgan maxsus parlament komissiyasi a’zolari xabarlar va maktublarni qo‘lga kiritdi. Hujjatlarning qachon jamoatchilikka e’lon qilinishi hozircha noma’lum.

G‘arbiy koalitsiyaning Iroqqa hujumidan so‘ng Saddam Husayn rejimi ommaviy qirg‘in quroliga ega emasligi aniqlangan, urushning asosiy maqsadi esa shu qurolni yo‘q qilishdan iborat bo‘lgan. Keyinroq Britaniya OAVlarida Bler va Bush aslida neft konlarini qo‘lga kiritish maqsadida jamoatchilikni chalg‘itgani haqida fikrlar paydo bo‘lgan.