Malayziya politsiyasi mamlakatda hibsga olingan diniy aqidaparastlar Malaysia Airlines’ning “Boing”i yo‘qolishiga aloqador ekanligi haqidagi Britaniya ommaviy axborot vositalarida tarqatilgan xabarlarni rad etib chiqdi. Bu haqda 4-may, yakshanba kuni The Star nashri xabar berdi.
Nashrning bu haqdagi savoliga javob berarkan, qirollik politsiyasi bosh inspektori Xolid Abu Bakar bu kabi xabarlarni safsata deb atadi va hibsga olingan diniy aqidaparastlarning samolyotga hech qanday aloqasi yo‘qligini ma’lum qildi.
Avvalroq, Britaniyaning Daily Mail nashri Malayziyada 11 nafar diniy aqidaparast hibsga olingani va ular yo‘qolgan “Boing” ishi bo‘yicha so‘roq qilingani haqida xabar bergan edi. Qo‘lga olinganlar, shuningdek, terrorchilik faoliyati bilan shug‘ullanganlikda ham gumon qilinmoqda, deb yozadi “Kun”.
Malaysia Airlines’ning Kuala-Lumpurdan Pekinga tomon uchib ketayotgan Boeing 777-200 samolyoti noma’lum sabablarga ko‘ra, dastlab o‘z yo‘nalishini o‘zgartirgan va shundan so‘ng 8-martga o‘tar kechasi radarlardan yo‘qolgan. Layner bortida 239 nafar kishi, ulardan 12 nafari ekipaj a’zosi bo‘lgan.
Mutaxassislarning fikricha, samolyot Hind okeanida halokatga uchragan. Biroq, salkam ikki oy davom etgan qidiruv ishlari hech qanday natija bergani yo‘q. 24-mart kuni Malaysia Airlines kompaniyasi laynerning barcha yo‘lovchilari halok bo‘lgan deb hisoblanishi haqida rasmiy bayonot bergan edi.
Izoh (0)