Misrning dunyodagi eng yirik Islom universiteti bo‘lmish Al-Azhar mutaxassislari Saudiya Arabistoniga haj ziyoratlarini keyinga qoldirish taklifi bilan chiqdi. Ulamolar kengashi vakili Mahmud Muhanniyning ta’kidlashicha, agarda o‘lim keltiruvchi koronavirus Makka va Madinaga ham tarqaladigan bo‘lsa, haj va umra ibodatlari vaqtini ko‘chirish haqida o‘ylab ko‘rish maqsadga muvofiqdir. Bu haqda “ITAR-TASS” xabar berdi.
Avvalroq Misr sog‘liqni saqlash vazirligi mamlakat fuqarolariga qirollikda koronavirus tarqalib ketgani sababli, Saudiya Arabistoniga haj safarlarini bu yil amalga oshirmay turishni qat’iy tavsiya qilgan edi.
Ta’kidlash joiz, ushbu xavfli virus ilk bor 2012-yil sentabrda Saudiya Arabistoni hududida aniqlangan. Mutaxassislar bir o‘rkachli tuyalar virusning manbasi bo‘lib xizmat qilganini taxmin etmoqda.
Koronavirus bilan zaharlanish holatlari Fransiya, Germaniya, Iordaniya va Buyuk Britaniyada ham qayd etilgan. Qirollikning o‘zida virus tufayli 100 dan oshiq kishi vafot etgan.
Izoh (0)