Obama va Merkel Kiyevning harakatlarini qo‘llab-quvvatladi

AQSh prezidenti Barak Obama Ukraina hukumatining mamlakat sharqini “tartibga solish”ga haqqi borligini ta’kidladi. Shu bilan birga, u tanglik vaziyatidan “diplomatik yechim” orqali chiqib ketish fikrini bildirdi. Bu haqda vesti.ru xabar berdi.

Ma’lum bo‘lishicha, u Oq uyda Angela Merkel bilan uchrashuvdan keyin bayonot bergan va barcha mas’uliyatni Kiyev hukumati bo‘ynidan olib, uning fikricha Rossiya tomonidan qo‘llab-quvvatlanayotgan, Ukrainadagi kuchlarga qo‘ydi.

U Moskvaga yana sanksiyalar bilan tahdid qildi va keyingi qadam Rossiya iqtisodiyotidagi butun boshli sohalarga sanksiyalar kiritish bo‘lishini ta’kidladi. “Bu Rossiyaga jazo emas, balki, uning to‘g‘ri yo‘l tanlashi uchun turtkidir”, — dedi u.

Germaniya kansleri Angela Merkel esa Ukrainaning o‘ziga tegishli majburiyatlarini bajarayotgani, biroq Rossiya Jeneva bitimiga amal qilmayotganini qayd etdi. U ham vaziyatning “diplomatik yechimi”ga qiziqish bildirdi va G‘arbning kelajakdagi sanksiyalarga tayyorligini ta’kidladi.