Buyuk Britaniya bosh vaziri Devid Kemeron, agarda mamlakatning Yevropa Ittifoqidan chiqib ketishi haqida referendum o‘tkaza olmasa, o‘z lavozimini tark etishga va’da berdi. Bu haqda The Daily Telegraph xabar berdi.
“Bu masalada voz kechish degan narsa bo‘lmaydi. Referendum o‘tkazish bo‘yicha vazifalarimizni bajara olmasak, men mamlakat bosh vaziri lavozimini ortiq egallamayman”, — dedi Kemeron Konservativ partiyadagi o‘z safdoshlari bilan telefon suhbati davomida.
Uning aytishicha, saylovchilar uning Yevroittifoq bilan munosabatlarni qayta ko‘rib chiqish haqidagi va’dasiga shubha bilan qaramoqda. Kemeronning Konservativ partiyadagi tarafdorlari uzoq vaqt davomida bosh vazirning YeIga a’zolik masalasini rasmiy darajaga olib chiqishiga erishishgan. 2015-yildagi parlament saylovlarida Konservativ partiya g‘olib chiqqan taqdirda, referendum 2017-yildayoq o‘tkazilishi mumkin. Biroq Liberal-demokratlar ko‘p ovoz olsa, tashabbus amalga oshmay qolishi xavfi bor.
Buyuk Britaniyaning YeIga a’zoligi bo‘yicha referendum masalasi 2011-yilda ko‘tarilgan. Biroq leyboristlar va liberallar ko‘pchiligidan iborat deputatlar uni o‘tkazishni rad etishgan. Kemeronning o‘zi ham ular orasida bo‘lgan va referendum o‘tkazmaslik qarorini Yevropaning tanglikda ekani bilan izohlagan.
Izoh (0)