Буюк Британия бош вазири Дэвид Кэмерон, агарда мамлакатнинг Европа Иттифоқидан чиқиб кетиши ҳақида референдум ўтказа олмаса, ўз лавозимини тарк этишга ваъда берди. Бу ҳақда The Daily Telegraph хабар берди.
«Бу масалада воз кечиш деган нарса бўлмайди. Референдум ўтказиш бўйича вазифаларимизни бажара олмасак, мен мамлакат бош вазири лавозимини ортиқ эгалламайман», — деди Кэмерон Консерватив партиядаги ўз сафдошлари билан телефон суҳбати давомида.
Унинг айтишича, сайловчилар унинг Евроиттифоқ билан муносабатларни қайта кўриб чиқиш ҳақидаги ваъдасига шубҳа билан қарамоқда. Кэмероннинг Консерватив партиядаги тарафдорлари узоқ вақт давомида бош вазирнинг ЕИга аъзолик масаласини расмий даражага олиб чиқишига эришишган. 2015 йилдаги парламент сайловларида Консерватив партия ғолиб чиққан тақдирда, референдум 2017 йилдаёқ ўтказилиши мумкин. Бироқ Либерал-демократлар кўп овоз олса, ташаббус амалга ошмай қолиши хавфи бор.
Буюк Британиянинг ЕИга аъзолиги бўйича референдум масаласи 2011 йилда кўтарилган. Бироқ лейбористлар ва либераллар кўпчилигидан иборат депутатлар уни ўтказишни рад этишган. Кэмероннинг ўзи ҳам улар орасида бўлган ва референдум ўтказмаслик қарорини Европанинг тангликда экани билан изоҳлаган.
Изоҳ (0)