Rossiyaning “Stroyproyekt” kompaniyasi Toshkentda 10 million dollarga biznes markaz quradi, deb xabar bermoqda Savdo-sanoat palatasi matbuot xizmati.
Qayd etilishicha, 2021-yil 5—10-oktyabr kunlari Sankt-Peterburg shahri gubernatori rahbarligidagi Rossiya ishbilarmon doira vakillarining mamlakatga tashrifi davomida o‘zaro aloqalarini mustahkamlash hamda qo‘shma loyihalarni amalga oshirish maqsadida davlat-xususiy sheriklik asosida Toshkent shahrida zamonaviy ishbilarmonlik markazini barpo etish loyihasini amalga oshirish taklifi bildirilgan.
Ishbilarmonlik markazini barpo etishda yer uchastkasidagi va atrofdagi mavjud daraxtlarga ziyon yetkazilmaydi hamda Ekologiya vazirligi bilan birgalikda barcha daraxtlar xatlovdan o‘tkazilib, ularning har biri raqamlanadi.
Ishbilarmonlik markazi muqobil va qayta tiklanuvchi energiyadan foydalanishni nazarda tutuvchi yangi zamonaviy energiya tejovchi tizimlar va texnologiyalar asosida faoliyat yuritadi.
Ishbilarmonlik markazi davlat-xususiy sheriklik shartlari asosida investor mablag‘lari hisobidan barpo etiladi. Bunda:
- ishbilarmonlik markazida beg‘araz asosda Savdo-sanoat palatasi Toshkent shahar boshqarmasi va Toshkent xalqaro arbitraj markazi (TIAC) joylashtiriladi;
- 10 million dollardan kam bo‘lmagan miqdorda to‘g‘ridan to‘g‘ri xorijiy investitsiyalar yo‘naltiriladi;
- kamida 150 ta yangi ish o‘rni yaratiladi.
Ishbilarmonlik markazi binosi zamonaviy shaharsozlik yechimlardan foydalangan holda qo‘shimcha 2 qavatli yerosti avtoturargohi bilan barpo etiladi.
Fevral oxirlarida Yangi Toshkent loyihasida 420 gektar maydonda “Markaziy bog‘” barpo etilib, 200 ming tup daraxt ekilishi to‘g‘risida xabar berilgandi.
Izoh (0)