Namangan viloyati 63-xalqaro gullar festivali 2024-yilning 19-mayidan 23-iyuniga qadar o‘tkaziladi. Bu haqda viloyat hokimligi matbuot xizmati xabar berdi.
Ushbu sanalarda xalqaro anjumanning tantanali ochilish hamda yopilish, faollar va g‘oliblarni taqdirlash marosimlari bo‘lib o‘tadi.
40 kun davomida betakror gul dizaynlari va maftunkor ko‘rgazmalardan zavqlanib, turli ko‘ngilochar tadbirlar, ko‘rik-tanlovlarda ishtirok etish imkoniyatiga ega bo‘lasiz, — deyiladi xabarda.
Eslatib o‘tamiz, 2023-yilda Namangandagi 62-xalqaro gullar festivali bir oy davom etgandi. Tadbir tashkilotchilarining bildirishicha, o‘tgan yilgi festival davomida 6 milliondan ortiq mehmon qarshi olingan. Ulardan 100 mingga yaqinini AQSH, Buyuk Britaniya, Germaniya, Yaponiya, Janubiy Koreya, Saudiya Arabistoni, Xitoy, Pokiston, Eron, Hindiston, Qozog‘iston, Qirg‘iziston, Tojikiston va Rossiya kabi 30 dan ziyod mamlakatdan kelgan xorijiy sayyohlar tashkil etgan.
Izoh (0)