Qoraqalpog‘iston Respublikasi va Qashqadaryo viloyatida tegishli hujjatlari bo‘lmagan hamda kuchli taʼsir qiluvchi dori vositalari muomalaga kiritilishining oldi olindi. Bu haqda Bosh prokuratura huzuridagi departament xabar berdi.
Qayd etilishicha, departamen hamda Bojxona qo‘mitasining Qashqadaryo viloyati boshqarmalari tomonidan Farmatsevtika mahsulotlari xavfsizligi markazi xodimlari bilan hamkorlikda tezkor tadbir o‘tkazilgan. Tadbirda “F.M.” xususiy korxonasiga va ushbu korxonaga qarashli dorixonada tegishli hujjatlari bo‘lmagan umumiy bahosi 307,8 million so‘mlik 218 turdagi dori vositalari mavjudligi aniqlanib, ushbu dori vositalari ashyoviy dalil sifatida olingan.
Departamentning Qoraqalpog‘iston Respublikasi boshqarmasi tomonidan Qo‘ng‘irot tumanida o‘tkazilgan tezkor tadbirda fuqaro G.M. fuqaro D.B.ga jami 720 ta kapsuladagi “Fatzorb Plus” va “Fatzorb TM Plus” nomli kuchli taʼsir qiluvchi dori vositalarini 4,6 million so‘mga sotgani aniqlanib, ushbu dori vositalari ashyoviy dalil sifatida olingan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Mart oxirlarida “G‘ishtko‘prik” postida 900 million so‘mlik dori vositalarini O‘zbekistonga olib o‘tmoqchi bo‘lgan shaxs to‘xtatib qolingani to‘g‘risida xabar berilgandi.
Izoh (0)