Davlat xavfsizligi xizmati Xorazm viloyati Urganch shahrida 2,9 milliard so‘mlik noqonuniy dori vositalari aniqlangani haqida xabar berdi.
Unga ko‘ra, holat Davlat xavfsizlik xizmatining Xorazm viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda o‘tkazilgan tezkor tadbirda aniqlangan. Urganch shahrida yashovchi fuqaro xonadonida 64 452 dona dori vositalarini kelgusida sotish maqsadida saqlab kelgan.
Baholash faoliyati bilan shug‘ullanuvchi MCHJ xulosasiga ko‘ra, mazkur dori vositalarining umumiy qiymati 2 milliard 908 million 608 ming so‘mni tashkil qiladi.
Sog‘liqni saqlash vazirligining “Farmatsevtika mahsulotlari xavfsizligi markazi” DM ekspertiza tekshiruvi xulosasiga ko‘ra, ushbu dori vositalarining ayrim turlariga nisbatan muvofiqlik sertifikatlari rasmiylashtirilmagani, ayrimlari esa sifatsiz va yaroqsiz holatda ekani ma’lum bo‘ldi.
Hozirda holat yuzasidan mazkur shaxsga nisbatan Jinoyat kodeksining 186-3 - moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Avvalroq Andijonda noqonuniy dori vositalari savdosi bilan shug‘ullanganlarga hukm o‘qilgandi. Dori vositalarining umumiy qiymati 1 mlrd 616 mln 802 ming so‘mni tashkil qilgan. Jinoyat ishlari bo‘yicha Qo‘rg‘ontepa tuman sudi tomonidan fuqaroga nisbatan 5 yil hamda sherigiga nisbatan 3 yil muddatga ozodlikdan mahrum qilish jazosi tayinlandi.
Izoh (0)