Давлат хавфсизлиги хизмати Хоразм вилояти Урганч шаҳрида 2,9 миллиард сўмлик ноқонуний дори воситалари аниқлангани ҳақида хабар берди.
Унга кўра, ҳолат Давлат хавфсизлик хизматининг Хоразм вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда ўтказилган тезкор тадбирда аниқланган. Урганч шаҳрида яшовчи фуқаро хонадонида 64 452 дона дори воситаларини келгусида сотиш мақсадида сақлаб келган.
Баҳолаш фаолияти билан шуғулланувчи МЧЖ хулосасига кўра, мазкур дори воситаларининг умумий қиймати 2 миллиард 908 миллион 608 минг сўмни ташкил қилади.
Соғлиқни сақлаш вазирлигининг “Фармацевтика маҳсулотлари хавфсизлиги маркази” ДМ экспертиза текшируви хулосасига кўра, ушбу дори воситаларининг айрим турларига нисбатан мувофиқлик сертификатлари расмийлаштирилмагани, айримлари эса сифатсиз ва яроқсиз ҳолатда экани маълум бўлди.
Ҳозирда ҳолат юзасидан мазкур шахсга нисбатан Жиноят кодексининг 186-3 - моддаси 3-қисми “а” банди билан жиноят иши қўзғатилиб, тергов ҳаракатлари олиб борилмоқда.
Аввалроқ Андижонда ноқонуний дори воситалари савдоси билан шуғулланганларга ҳукм ўқилганди. Дори воситаларининг умумий қиймати 1 млрд 616 млн 802 минг сўмни ташкил қилган. Жиноят ишлари бўйича Қўрғонтепа туман суди томонидан фуқарога нисбатан 5 йил ҳамда шеригига нисбатан 3 йил муддатга озодликдан маҳрум қилиш жазоси тайинланди.
Изоҳ (0)