Toshkent va Surxondaryo viloyatlarida chiqindi xizmati uchun to‘lov tarifi belgilandi. Bu haqda Chiqindilarni boshqarish agentligi xabar qildi.
Toshkent hamda Surxondaryo viloyati hududlarida maishiy chiqindi xizmatlari uchun to‘lov tariflarini tartibga solish maqsadida Xalq deputatlari viloyat kengashining tegishli sessiya qarorlari bilan qattiq va suyuq maishiy chiqindilarni to‘plash va olib chiqib ketish bo‘yicha ko‘rsatiladigan xizmatlar uchun yagona to‘lov tariflari tasdiqlandi.
Unga ko‘ra, Toshkent viloyatining ayrim hududlarida jismoniy shaxslar yaʼni aholi uchun 7 840 so‘m (QQS bilan) hamda yuridik shaxslarga 1 metr kub uchun 82 880 so‘m (QQS bilan) to‘lov miqdori belgilandi.
Belgilangan to‘lov tarifi Toshkent viloyati “Toza Hudud” davlat unitar korxonasi hamda “Angren Bunyod Fayz” MCHJ, “Nurli yo‘l marvaridi” MCHJ, “Ohangaron sanitariya tozalash” MCHJ, “Rahnamo Servis” MCHJ, “Zero-Waste” MCHJ kabi sanitar tozalash korxonalari uchun tasdiqlandi.
Ular quyidagi hududlarga xizmat ko‘rsatadi:
- Nurafshon, Ohangaron, Olmaliq, Angren, Chirchiq, Yangiyo‘l shaharlari;
- Toshkent, Zangiota, Ohangaron, Yuqorichirchiq, Quyichirchiq, Parkent, Bo‘stonlik, Qibray, Chinoz, Yangiyo‘l tumanlari.
Surxondaryo viloyatining barcha shahar va tumanlarida aholi uchun 7 000 so‘m (QQSsiz) (QQS bilan 7840 so‘m) hamda yuridik shaxslarga 1 metr kub uchun 122 219 so‘m (QQSsiz) (QQS bilan 136 885,28 so‘m) miqdorida to‘lov tasdiqlandi. Belgilangan to‘lov tarifi “Toza hudud” UK, “Bio Texno Eko” MChJ, “Bio Tex Eco” MChJ, “Qiziriq invest” MChJ, “Sale kingdom” MChJ va “Sho‘rg‘un kommunal foydalanish” MChJ kabi sanitar tozalash korxonalari uchun amal qiladi.
Agentlik xabarida ta’kidlanishicha, bu chora-tadbirlar prezidentning “Maishiy va qurilish chiqindilari bilan bog‘liq ishlarni boshqarish tizimini yanada takomillashtirish chora-tadbirlari to‘g‘risida”gi hamda “Sanitar tozalash ishlarini tashkil etish va aholi punktlarida tozalikni taʼminlash bo‘yicha qo‘shimcha chora-tadbirlar to‘g‘risida”gi qarorlari va Vazirlar Mahkamasining “Chiqindilar bilan bog‘liq ishlarni amalga oshirish sohasidagi normativ-huquqiy hujjatlarni tasdiqlash to‘g‘risida”gi qarori ijrosini taʼminlash maqsadida amalga oshirilmoqda.
2024-yil 1-apreldan xizmat ko‘rsatuvchi korxona tomonidan ko‘rsatiladigan sanitar tozalash xizmatlari qiymatiga nisbatan qo‘shilgan qiymat solig‘i hisoblash boshlandi. Shu sababli tariflar 12 foizga oshdi.
Izoh (0)