Raqobatni rivojlantirish va iste’molchilar huquqlarini himoya qilish qo‘mitasi Qashqadaryo viloyatida fuqarolarning ko‘plab e’tirozlari asosida chiqindi bilan bog‘liq muammolar yuzasidan o‘rganish o‘tkazdi.
Viloyatning 15 ta tuman-shahridagi 821 ta mahallada 3 million 482,3 ming aholi mavjud. Sanitar tozalash korxonalari 762 ta mahallaha (2 million 533 ming aholi) chiqindilarni to‘plash va olib chiqib ketish xizmatlari ko‘rsatib keladi. Ya’ni bu xizmatlar viloyatning 92,8 foiz mahallasi yoki 72,7 foiz aholisini qamrab olgan.
Biroq aholi to‘liq xatlovdan o‘tkazilmagani, chiqindilarni to‘plash va olib chiqib ketish xizmatlari bo‘yicha shartnomalar xonadonlar bilan emas, mahalla fuqarolar yig‘ini bilan tuzilgan. Chiqindi topshirmaydigan va hech kim yashamaydigan xonadonlarga ham xizmat haqlari hisoblanishi hamda chiqindilarni 10−15 kungacha bo‘lgan muddatda kechiktirib olib ketilayotgani e’tirozlar ko‘payganini ko‘rsatgan.
O‘rganish davomida 2024 yilning 1-choragidagi qarzdorlik summalari, chiqindi tashish xizmatlarining ko‘rsatilmaganlik vaqtlari uchun hisoblanib kelinayotgan summalar tahlil qilingan.
O‘rganish natijalariga ko‘ra, ko‘rsatilmagan xizmatlar qismi uchun nomuayyan doiradagi 351 ming 153 ta xonadonda yashovchi 1 million 452 ming 276 nafar iste’molchiga jami 15 milliard 593 million so‘m qarzdorlik hisoblangan. Natijada 10 milliard 929 million so‘mlik mablag‘ qarzdorlik hisobidan chiqarilib, iste’molchilar foydasiga hal qilingan.
Qattiq maishiy chiqindilarni olib chiqib ketishning minimal davriyligi chiqindi to‘plash shoxobchalaridan — bir kunda bir marotaba va yakka tartibdagi turar joy sektoridan “signal” usulida — uch kunda bir marotabani tashkil qilishi belgilangan.
Bir necha kun oldin Toshkent va Sirdaryoda ikki tadbirkorga gaz bo‘yicha asossiz hisoblangan 15 mlrd so‘m qarzdorlik bekor qilingani to‘g‘risida xabar berilgandi.
Izoh (0)