“Toshkent invest kompaniyasi” aksiyadorlik jamiyati 14—20-dekabr kunlari boshlang‘ich narxi salkam 8 milliard so‘mlik tender o‘tkazdi.
Platformaga joylangan texnik topshiriq hujjatida shaharda transport vositalari to‘xtab turish joylarini boshqarish, ulardan foydalanishni avtomatlashtirish uchun dasturiy ta’minotni yaratish, texnik qo‘llab-quvvatlash va modernizatsiya qilish belgilangan. Xizmatlarni ko‘rsatish muddati shartnoma imzolangandan boshlab 270 kalendar kuni hisoblanadi.
“Pulli to‘xtash joylari” yagona axborot tizimini yaratish uchun taklif qilingan boshlang‘ich narxi 8 milliard 225 million 757 ming 968 so‘m etib belgilangan.
Lotni yutib olish uchun ikkita – Rossiyaning Intermobiliti mas’uliyati cheklangan jamiyati hamda Streetpark Systems kompaniyasi ishtirok etgan.
Yakuniy natijaga ko‘ra, loyihaga 6 milliard 780 million so‘m taklif qilgan Streetpark Systems MCHJ 100 ball bilan g‘olib deb topilgan. “Intermobiliti” esa 97.8961 ball bilan zaxira g‘olib sifatida ko‘rsatib o‘tilgan. Bayonnomaga komissiya a’zolarining 6 nafari roziligini, 1 nafari esa betarafligini bildirgan.
Ma’lumot uchun, Streetpark Systems kompaniyasi 17-dekabr kuni o‘tkazilgan auksion savdosi yakunlariga ko‘ra, Toshkent ko‘chalarida avtomobillarning pulli to‘xtab turish joylarini tashkil etish huquqiga ega hisoblanadi.
G‘olib kompaniya haqida
Streetpark Systems 2024-yilning 13-noyabrida ro‘yxatga olingan. Kompaniya ta’sischilaridan biri — Kudratbek Dilshadovich Yakubov bo‘lib (Leader Great Trade, Aziz Export 777, Prime Avto Consulting MCHJlariga ham egalik qiladi), u 75 foiz ulushga ega. Qolgan 12,5 foizi Vengriyaning iCell Mobilsoft Zrt va Kasy Park kompaniyalariga tegishli.
“Gazeta.uz”ning yozishicha, Toshkentda pulli avtoturargohlar tashkil etish huquqi uchun o‘tkazilgan birinchi auksionning asosiy va zaxira g‘olibi yer ijarasi bo‘yicha shartnoma imzolamagani sababli ularning g‘olibligi bekor qilingan. 572 million so‘m miqdoridagi omonat kuyib ketgan Balcomuz kompaniyasi 12 oyga auksionlarda ishtirok etishdan chetlatilgan. Zaxira g‘olibining ham omonati kuyib ketgan.
Toshkentda pulli to‘xtash joylari
Toshkentda avtomobillar uchun yo‘l bo‘ylarida pulli to‘xtash joylari tashkil etilishi haqida 2021-yilda ma’lum bo‘lgandi. O‘shanda “Toshkent shahar transporti va yo‘l-transport infratuzilmasini 2025-yilgacha rivojlantirish konsepsiyasini tasdiqlash to‘g‘risida”gi Vazirlar Mahkamasi qarori loyihasida poytaxtdagi tirbandliklarni, markaziy ko‘chalarda transport oqimini kamaytirish, avtomobillarning yo‘l bo‘yida betartib to‘xtashini tartibga solish maqsadida yagona avtomobil yo‘l bo‘yi pulli to‘xtash joylari tizimini tashkil etish zarurligi aytilgandi.
Dastlab 10 ta markaziy ko‘chada pulli avtomobil to‘xtash joylari tarmog‘i paydo bo‘lishi e’lon qilindi.
Prezidentning 2022-yil 2-fevraldagi qaroriga muvofiq, 2022-yilda 10 ta markaziy ko‘chalarda, ya’ni Glinka, Bratislava, Mirobod, Avliyo ota, Taras Shevchenko, Said Baraka, Moshtabib, Fidokor, Sodiq Azimov va Yakub Kolas ko‘chalarida davlat-xususiy sheriklik asosida avtomobillarning avtomatlashtirilgan yo‘l bo‘yi pulli to‘xtash joylarini tashkil etish belgilandi.
2024-yil 16-oktyabr kuni Shavkat Umurzoqov Toshkent shahrida transport vositalarining pulli to‘xtab turish faoliyatini yanada takomillashtirish chora-tadbirlari to‘g‘risidagi qarorni imzoladi. Hujjatda pulli to‘xtab turish joylaridan foydalanganlik uchun to‘lovlar miqdori ham tasdiqlandi. Parking hududlari 5 ta tarif zonasiga bo‘linadi.
Bir soatlik to‘xtab turish narxlari:
- 1-tarif zonasida 12 ming so‘m;
- 2-tarif zonasida 10 ming so‘m;
- 3-zonada 8 ming so‘m;
- 4-zonada 6 ming so‘m;
- 5-tarif zonasida 5 ming so‘mni tashkil qiladi.
Parking transport vositalarini saqlash uchun mo‘ljallanmagan. U yerda uchinchi shaxslar tomonidan transport vositalarining olib qochilishi va shikastlanishi xavfi avtomobillar egalari zimmasida qoladi.
Ijaraga beriladigan maydonlarning umumiy hajmi 262,8 ming kvadrat metrni tashkil etadi. Bunda quyidagi ko‘chalar qamrab olinadi:
- Toshkentning markaziy qismi (jumladan, Amir Temur xiyoboni, Movarounnahr, Istiqlol, Yahyo G‘ulomov, O‘zbekiston ovozi, Istiqbol, Sodiq Azimov, Taras Shevchenko, Shahrisabz, Yakkachinor, Shastri, Mahatma Gandi, Hamid Olimjon, Chexov va boshqa ko‘chalar);
- Uchtepa va Chilonzor tumanlari (Kichik halqa avtomobil yo‘li, Farhod, Lutfiy, Cho‘ponota, Muqimiy, Qatortol, Chilonzor, Arnasoy, Yesenin, Beshqayrag‘och ko‘chalari);
- Sergeli va Yangihayot tumanlari (Yangi Sergeli, Tursunzoda, Alaviya, Shokirariq, Islom Sattorov, Qipchoq, Qo‘rg‘ontepa, Birodarlik ko‘chalari);
- Olmazor va Shayxontohur tumanlari (Labzak, Sebzor, Gulobod, Forobiy, Beltepa, Qoraqamish, Qorasaroy, Shimoliy Olmazor ko‘chalari);
- Bektemir tumani (Husayn Boyqaro ko‘chasi);
- Mirobod tumani (Yangi Qo‘yliq ko‘chasi);
- Yashnobod tumani (Ohangaron yo‘li ko‘chasi, Quyi Tolariq, Sivets, Quruvchilar ko‘chalari).
2024-yil 19-yanvarda “Yo‘l harakati to‘g‘risida”gi qonun prezident tomonidan imzolangandi. Qonunda pulli to‘xtab turish joylarining egalari ushbu joylardan foydalanganlik uchun to‘lov miqdorini Qoraqalpog‘iston Vazirlar Kengashi, viloyatlar va Toshkent shahar hokimliklari tomonidan Iqtisodiyot va moliya vazirligi bilan kelishilgan holda belgilanadigan cheklangan miqdorlardan yuqori bo‘lmagan tariflar bo‘yicha mustaqil ravishda belgilashi qayd etilgan.
Izoh (0)