Transport vazirligi “Toshkent shahar transporti va yo‘l-transport infratuzilmasini 2025-yilgacha rivojlantirish konsepsiyasini tasdiqlash to‘g‘risida”gi Vazirlar Mahkamasi qarori loyihasini muhokamaga qo‘ydi.
Loyihada keltirilishicha, Toshkent shahri hududi kengayib borishi, yangi ishlab chiqarish obyektlari paydo bo‘lishi hamda aholiga ko‘rsatiladigan transport xizmatlari sifatini oshirish, yo‘lovchi tashish transporti xizmatlariga bo‘lgan ehtiyoj va talabni to‘liq qondirish maqsadida shahar yo‘lovchilar transporti yo‘nalishlar tarmog‘ini tubdan qayta ko‘rib chiqish dolzarbligini ko‘rsatmoqda.
Shu bilan birga, avtotransport vositalari sonining ko‘payib borishi, avtobus yo‘nalishlari samarasizligi va bir-birini takrorlashi shahar yo‘lovchilar transportida yuklamalar nomutanosibligini, aholi uchun noqulayliklarni keltirib chiqarmoqda.
Shu sababli Toshkent shahar transporti va yo‘l-transport infratuzilmasini 2025-yilgacha rivojlantirish konsepsiyasi tasdiqlanishi mumkin.
Unga ko‘ra, Toshkent shahridagi tirbandliklarni, markaziy ko‘chalarda transport oqimini kamaytirish, shaxsiy va jamoat transportining o‘rtacha harakatlanish tezligini oshirish, avtomobillarning yo‘l bo‘yida betartib to‘xtashini tartibga solish, transport vositalaridan atrof muhitga chiqarilayotgan zaharli moddalar miqdorini kamaytirish, aholining jamoat transportidan foydalanishini rag‘batlantirish maqsadida Toshkent shahrida yagona avtomobil yo‘l bo‘yi pullik to‘xtash joylari tizimini tashkil etish zarur.
Ushbu yagona tizimga shahar markazida, yirik bozorlar, savdo markazlari oldida tashkil etiladigan avtomobillarning yo‘l bo‘yi pullik to‘xtash joylari, yirik transport bog‘lamalari, metroning oxirgi va yo‘lovchi oqimi yuqori bo‘lgan bekatlari va shaharga asosiy kirish joylari yonida tashkil etiladigan avtoturargohlar, aholi yashash joylarida tashkil etiladigan ochiq avtomobil saqlash joylari tarmoqlari kiritilishi kerak.
Birinchi bosqichda Toshkent shahrining 10 ta ko‘chasida, kelgusida talabdan kelib chiqib boshqa ko‘chalarda ham avtomobillarning avtomatlashtirilgan yo‘l bo‘yi pullik to‘xtash joylari tizimi davlat-xususiy sheriklik tamoyillari asosida tashkil etiladi.
Avvalroq O‘zbekistonda avtomototransport vositalarini ijaraga berishda notarial tasdiqlash tartibi bekor qilinayotgani, mamlakatda yuridik shaxslar ham avtomobillarni qisqa muddatga ijaraga olishi mumkin bo‘lgani to‘g‘risida xabar berilgandi.
Izoh (0)