Germaniyada yetarli miqdorda ko‘ngillilarni jalb etish imkoni bo‘lmasa, 2026-yildan majburiy harbiy xizmatga qaytiladi. Bu haqda mamlakat mudofaa vaziri Boris Pistorius ma’lum qildi.
Bizning modelimiz dastlab ixtiyoriy ishtirokka asoslangan. Agar bizda ixtiyoriy arizalardan ko‘ra ko‘proq bo‘sh o‘rinlar paydo bo‘ladigan vaqt kelsa, shunda majburiy xizmatni joriy etish to‘g‘risida qaror qabul qilishimiz mumkin, deya izoh berdi u.
Vazir tegishli qonun loyihasi kelgusi yilning 1-yanvaridan kuchga kirishi mumkinligini ta’kidladi. Germaniya armiyasida majburiy harbiy xizmat 2011-yilda faqat tinchlik davri uchun bekor qilingan edi. Ayni paytda harbiy xizmatchilar tanqisligi — taxminan, 100 ming kishilik yetishmovchilik sababli mamlakatda yana harbiy chaqiruvni qayta joriy etish masalasi ko‘tarilmoqda.
Pistoriusning so‘zlariga ko‘ra, yaqin 2,5 yil ichida faqat qo‘shimcha harbiylar hisobiga kerakli miqdordagi odamlarni to‘plashning iloji yo‘q.
Buning uchun zaxiraning bir qismini tiklashimiz kerak. Bizda 800 mingga yaqin zaxiradagi askar bor, ulardan 60 ming nafari xizmatga tayyor, dedi vazir.
Zaxiraga “qiziqish bildirgan” yana 150 minggacha odamni safarbar qilish mumkin. Vazirning hisob-kitobiga ko‘ra, faol shaxsiy tarkib, zaxiradagilar va qayta chaqirilishi mumkin bo‘lganlarni qo‘shib hisoblaganda, umumiy kuch 460 ming kishini tashkil etadi.
Pistorius 2024-yil Germaniyada harbiy majburiyat qaytarilmasligini, buning o‘rniga mamlakatda yoshlarni ixtiyoriy ravishda armiyaga jalb qilishga asoslangan xizmat modeli joriy etilishini aytgandi. O‘sha paytda hali kansler bo‘lmagan Fridrix Mers ham xizmatni ixtiyoriy asosda rivojlantirish niyatida ekanini aytgan. Lavozimga kirishgach, u mamlakat qurolli kuchlarini Yevropaning eng kuchli armiyasiga aylantirishni o‘z hukumatining ustuvor vazifasi deb atadi.
Bunday rejalar G‘arb siyosatchilarining 2029-yilgacha urushga tayyorgarlik ko‘rish haqidagi chaqiriqlari fonida yangramoqda. Rossiya prezidenti Vladimir Putin NATO davlatlariga ehtimoliy hujum haqidagi bayonotlarni “vasvasa” deb atagandi.
Izoh (0)