Nig‘matilla Yo‘ldoshev 21-iyun kuni ikkinchi muddatga O‘zbekiston bosh prokurori lavozimiga tasdiqlandi.
Senatning ellik uchinchi yalpi majlisida bosh prokuror lavozimiga nomzod ko‘rib chiqildi va senatorlar qarshilarsiz, betaraflarsiz Nig‘matilla Yo‘ldoshevni bosh prokuror lavozimiga ma’qulladi.
“Nomzod masalasini joylardagi mahalliy kengashlar bilan ham muhokama qilib olganmiz. Hammalari: joylardagi senatorlar ham, mahalliy kengash deputatlar ham bundan keyin prokuratura tizimlari bilan hamkorlikda ishlab, xalqimiz farovonligi yo‘lida birgalikda ishlaymiz degan niyatdamiz”, — dedi senat raisi Tanzila Norboyeva.
Nig‘matilla Yo‘ldoshev 2019-yil 20-iyunda O‘zbekiston bosh prokurori etib tayinlangandi. Prokuratura to‘g‘risidagi qonunga ko‘ra, bosh prokuror vakolat muddati 5 yil. Bosh prokurorni lavozimiga tayinlash hamda lavozimidan ozod etish to‘g‘risidagi farmonlari Oliy Majlis Senati tomonidan tasdiqlanadi.
Yalpi majlisda Raqobatni rivojlantirish va isteʼmolchilar huquqlarini himoya qilish qo‘mitasi raisini saylash, Sudyalar Oliy kengashi tarkibiga o‘zgartirishlar kiritish masalalari ham ko‘rib chiqiladi.
Izoh (0)