Qashqadaryo viloyatining Kitob tumanida yo‘l qurilishi sabab 6 ta chinor kesildi. Viloyat prokuraturasi mazkur holat yuzasidan o‘rganish ishlarini boshladi.
Aniqlanishicha, Kitob tumani hokimining 2019-yildagi qaroriga asosan, tuman hududidagi 4R-23L avtomobil yo‘lining 0-5 kilometr qismida to‘la ta’mirlash ishlari olib borish jarayonida yo‘l qurilishi mintaqasiga tushgan ko‘p yillik daraxtlarni kesishga ruxsat berilgan.
19-iyun kuni “Kitob yo‘l qurilish-taʼmirlash” MCHJ xodimlari tomonidan 6 ta chinor kesib olingan.
Umumiy foydalanishdagi avtomobil yo‘llarini qurish va rekonstruksiya qilish direksiyasi davlat unitar korxonasi va viloyat Ekologiya va atrof-muhitni muhofaza qilish boshqarmasi o‘rtasida 2019-yilda rasmiylashtirilgan hisob fakturaga asosan kesilgan daraxtlar uchun salkam 250 million so‘m to‘lab berilishi nazarda tutilgan va ushbu mablag‘lar to‘lab berilgan.
Tuman hokimligi matbuot xizmatining bildirishicha, holat Ekologiya va atrof-muhitni muhofaza qilish viloyat boshqarmasi tomonidan doimiy nazorat qilib borilmoqda. Qashqadaryo viloyati Ekologiya va atrof-muhitni muhofaza qilish boshqarmasi matbuot xizmati esa viloyat prokuraturasi tomonidan mazkur holat yuzasidan o‘rganish ishlari olib borilayotganini ma’lum qildi.
Ma’lumot uchun, “Respublikada ko‘kalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari to‘g‘risida”gi prezident farmoni bilan davlat o‘rmon fondiga kirmaydigan daraxtlar va butalar qimmatbaho navlarining kesilishiga moratoriy muddatsiz davrga uzaytirilgan.
Izoh (0)