Toshkentning Bo‘rijar kanaliga tushib ketgan qizni qutqargan erkakning o‘zi halok bo‘ldi. Bosh prokuratura matbuot kotibi Hayot Shamsutdinov holat yuzasidan tergovga qadar tekshirish harakatlari olib borilayotganini ma’lum qildi.
“Ushbu voqeada jasorat ko‘rsatgan marhumning yaqinlariga chuqur ta’ziya izhor etib, hamdardlik bildiramiz”, deydi Shamsutdinov.
Voqea 5-may kuni kechqurun sodir bo‘lgan. “Gazeta.uz”ning yozishicha, Yakkasaroy tumanidagi “Rakat” mahallasi yashovchi yetti-sakkiz yoshlardagi uch qizaloq qirg‘oqqa tushgan. Qizlardan biri sirpanib, suvga tushib ketgan. Oqim qizchani kanal markaziga oqizib ketgan. Dugonasiga yordam bermoqchi bo‘lgan boshqa qiz ham suvga sakragan. Oqim uni kanal qirg‘og‘i bo‘ylab pastga oqizib ketgan. Shundan so‘ng bolalar yordamga chaqirgan.
Qizlardan birini yaqin atrofda yashovchi ayol xoda yordamida qutqarib olgan. Quyi oqimdagi ikkinchi qizchani 43 yoshli erkak A.S. suvga tushib, qutqargan, biroq o‘zi halok bo‘lgan. Uning jasadi cho‘kib ketgan joyidan 4 kilometr uzoqlikdan topilgan.
Baxtsiz hodisaga sayr zonasi barpo etilayotgan joyda xavfsizlik talablariga rioya etib suvga tushiladigan yo‘llar yopilmagani, kanal bo‘ylari betonlashtirilgani sabab tayanib chiqish imkoni bo‘lmagani sabab bo‘lgani aytilmoqda.
Izoh (0)