Farg‘ona viloyati Rishton tumani Do‘tir qishlog‘ida 29 yoshli yigit Katta Farg‘ona kanaliga cho‘kib ketdi. Bu haqda Facebook’da Bahodir Eliboyev ismli foydalanuvchi ma’lum qildi.
Ta’kidlanishicha, yigit daryoda cho‘milmoqchi bo‘lgan va noma’lum sabablarga ko‘ra cho‘kib ketgan. Eliboyevning yozishicha, yigitning cho‘kib ketganiga yetti kun bo‘lgan va uni qidirish bilan asosan qishloq aholisi shug‘ullanmoqda.
“Birgina g‘avvos kelgan, kattagina kanalning loyqa suvlari orasidan izlash uchun atigi birgina g‘avvos! Baraka topsin, astoydil qidirayotgan ekan yolg‘iz bo‘lsa ham. Avvalo, hech kimda bunday voqea bo‘lmasin, mabodo, suvda yo‘qolgan yigit qaysidir rahbar, boring ana, qaysidir amaldorning o‘g‘li bo‘lsa, nima bo‘lardi? Kanal suvi quritilardi! Ja bo‘lmasa, suvi pasaytirilib, o‘ntacha g‘avvos tashlanardi izlashga. Noto‘g‘ri bo‘lsa, gapiringlar.
Biz qachonki do‘tirlik hamyurtimizni mening jigarim, o‘zimning hamqishlog‘im deb qabul qilmas ekanmiz, birdamlik haqida gapirishga erta. Umuman olganda esa, biz hech qachon birovning dardini o‘zimniki deb qabul qilishni o‘rganolmaymiz”, — deb yozadi foydalanuvchi.
Eslatib o‘tamiz, 2021-yilning mart oyida Katta Farg‘ona kanalida cho‘kib ketgan o‘smir yigit murdasi ikki oydan ortiq vaqt o‘tib topilgandi.
Mavzuga doir:
- Farg‘onada eri bilan janjallashib, o‘zini Katta Farg‘ona kanaliga tashlagan 22 yoshli ayolning jasadi uch kundan so‘ng topildi
- Katta Farg‘ona kanalining cho‘milish mumkin bo‘lmagan hududida 15 yoshli bola cho‘kib ketdi
- Namangandagi Norin daryosida cho‘kayotgan uch kishining ikki nafari qutqarildi, yana birining jasadi olib chiqildi
Izoh (0)