Namangan viloyati Uychi tumanida talaba yigit daryoda cho‘kib ketdi. Bu haqda viloyat Favqulodda vaziyatlar boshqarmasi axborot xizmati xabar berdi.
Unga ko‘ra, 6-iyun kuni soat 13:00 larda Namangan viloyati Favqulodda vaziyatlar boshqarmasiga Uychi tumani hududidan oqib o‘tuvchi Norin daryosida cho‘milish maqsadida borgan fuqaro ehtiyotsizligi oqibatida cho‘kib ketgani to‘g‘risida xabar kelib tushgan.
Xabarga asosan boshqarma Yong‘in-qutqaruv otryadining suvda qidiruv-qutqaruv guruhi zudlik bilan voqea joyiga yetib borib, hozirda suvosti va suvusti qiduruv ishlarini olib bormoqda.
O‘zbekistonda cho‘kib ketish holatlari
O‘zbekistonda 2022-yil yoz mavsumida 142 nafar fuqaro cho‘kish bilan bog‘liq vaziyat tufayli vafot etgan. Baxtsiz hodisalar 51 holatda cho‘milish taqiqlangan, ruxsat etilmagan, cho‘milish uchun sharoit bo‘lmagan, xavfli suv havzalarida cho‘milganlik oqibatida, 85 holatda esa ehtiyotsizlik sabab yuzaga kelgan.
Ushbu cho‘kkanlarning 45,3 foizi voyaga yetmaganlar hisobiga to‘g‘ri keladi. Ehtiyotsizlik oqibatida yuzaga kelgan 85 kishining cho‘kishi daryo, kanal hamda ariqlar ustidagi suv, gaz, chiqindi oqova suv quvurlaridan yo‘lni qisqartirish maqsadida ko‘prik sifatida foydalanib o‘tishlari hamda suv havzalari qirg‘oq bo‘ylarida xavfsizlik qoidalariga rioya etmagani sababli yuz bergan.
Hozirda holat yuzasidan tergovga qadar tekshiruv harakatlari davom ettirilmoqda, natijasi yuzasidan qonuniy qaror qabul qilinishi taʼminlanadi.
Izoh (0)