Namanganda 2021-yil davomida suvga cho‘kish bilan bog‘liq 24 ta baxtsiz hodisa sodir bo‘ldi. Bu haqda viloyat Favqulodda vaziyatlar boshqarmasi boshlig‘ining o‘rinbosari, podpolkovnik Dilmurod Abdurahmonov ma’lum qildi, deya xabar beradi “Daryo” muxbiri Azizbek Abduvaliyev.
FVB mutasaddisining aytishicha, ushbu hodisalarning aksariyati, aniqrog‘i, 21 tasi voyaga yetmaganlar bilan bog‘liq.
“Mavsum oldidan Namangandagi daryo, kanal va soylar hamda shahar-tumanlarda joylashgan 8 ta suv ombori qirg‘oqlariga xodimlarimiz tomonidan 1000 ga yaqin cho‘milish ta’qiqlanganini anglatuvchi belgilar o‘rnatildi. Afsuski, bolalarimiz ko‘pincha aynan mana shunday belgilar ostidagi joylarda cho‘milayotganiga guvoh bo‘lamiz. Cho‘milayotgan bolalarning ko‘pi asli suzishni bilmaydi, bunga o‘rgatilmagan. Yana bir muammo — kattalarning beparvoligi va loqaydligi. Ona yosh bolalarini qarovsiz qoldirib, ma’raka-marosimga ketyapti, ota voyaga yetmagan bolasini suv yoqasidagi do‘konga yuboryapti. Cho‘kayotgan shaxsni maxsus tayyorgarlikdan o‘tgan xodimlar kelib qutqarib olish ehtimoli esa juda kam, chunki bu jarayon ma’lum bir vaqtni talab qiladi”, — deydi Dilmurod Abdurahmonov.
Ma’lumot uchun, joriy yil 5 oyi davomida Namanganda 8 kishi suvga cho‘kib ketdi. Ulardan 6 nafari voyaga yetmaganlar.
Izoh (0)