Adliya vazirining “Advokat stajyori va yordamchisining faoliyatini tashkil etish tartibi to‘g‘risidagi nizomni tasdiqlash haqida”gi buyrug‘i qabul qilindi, deb xabar beradi Norma.
Hujjat bilan Advokat stajyori va yordamchisining faoliyatini tashkil etish tartibi to‘g‘risidagi nizom tasdiqlandi. Advokat maqomiga ega bo‘lishga talabgor shaxs stajirovkani qaysi advokatlik tuzilmasida o‘tash niyatida bo‘lsa, o‘sha advokatlik tuzilmasiga ariza bilan murojaat qiladi. Talabgor stajirovkani Advokatlar palatasining yuridik maslahatxonasida o‘tash uchun tegishli hududiy boshqarmaga murojaat qiladi.
Arizaga quyidagi hujjatlar ilova qilinadi:
- O‘zbekiston fuqarosi pasportining (identifikatsiyalovchi ID-kartasi) nusxasi;
- oliy yuridik maʼlumot to‘g‘risidagi diplom nusxasi;
- sudlanmaganlik (yoki sudlanganlik) to‘g‘risida maʼlumotnoma;
- oxirgi ish joyi bo‘yicha tasdiqlangan qog‘oz shaklidagi mehnat daftarchasini yoki elektron mehnat daftarchasidan ko‘chirmani, bundan birinchi marta ishga kirayotgan shaxslar mustasno.
O‘rindoshlik asosida ishga kirayotgan shaxslar mehnat daftarchasining o‘rniga asosiy ish joyidan olingan belgilangan namunadagi maʼlumotnomani taqdim etadi.
Stajirovka kamida 3 oy davom etadi. Stajirovkaning eng ko‘p muddati — 2 yil.
Uzoq muddat (vaqtincha mehnatga qobiliyatsizlik, homiladorlik va tug‘ish taʼtillari, bola parvarishlash taʼtillari, ishdan ajralgan holda malaka oshirish, stajirovkaga rahbarining litsenziyasining amal qilishi to‘xtatib turilishi yoki tugatilishi kabi holatlarda) ishda bo‘lmagan vaqt stajirovka muddatiga qo‘shilmaydi.
Stajirovka rahbarining advokatlik maqomi, advokatlik faoliyati uchun litsenziyasining amal qilishi to‘xtatib turilishi yoki tugatilishi sababli stajirovkaning maʼlum muddati o‘talmay qolgan taqdirda, stajyorning tanloviga ko‘ra stajirovka ana shu davrga uzaytirilishi yoki stajyor boshqa advokatlik tuzilmasida yoki boshqa advokat rahbarligida stajirovkani davom ettirishi mumkin
Ayni bir shaxs bir vaqtning o‘zida bitta advokatlik tuzilmasida advokatlik faoliyatini amalga oshirayotgan bir necha mutasaddi-advokatlarning yordamchisi bo‘lishi mumkin, bu hol yordamchini ishga qabul qilish to‘g‘risidagi buyruqda va mehnat shartnomasining shartlarida aks ettirilishi kerak.
Yordamchining tergovga qadar tekshiruvni amalga oshiruvchi organlarda, surishtiruv, dastlabki tergov organlarida, sudlarda hamda boshqa davlat organlarida ishlarni yuritishiga yo‘l qo‘yilmaydi. Yordamchi mutasaddi-advokat ko‘rsatmasiga asosan mutasaddi-advokatning ish yurituvidagi ishlar bo‘yicha mutasaddi-advokatning protsessual vakolatlariga taalluqlilaridan tashqari topshiriqlarni bajaradi.
Stajyor yoki yordamchi bilan mehnat shartnomasi tuzilganligi va bekor qilinganligi bo‘yicha buyruqlarning nusxalarini ular rasmiylashtirilgan kundan eʼtiboran besh ish kuni ichida “Yuridik yordam” axborot tizimiga kiritiladi. Stajyor va yordamchiga nisbatan Advokatning kasb etikasi qoidalari va advokatlik sirini saqlashga doir talablar tatbiq etiladi.
Hujjat Qonun hujjatlari maʼlumotlari milliy bazasida eʼlon qilingan va 2024 yil 5-iyundan kuchga kirdi.
Eslatib o‘tamiz, 2022-yil dekabrda Shavkat Mirziyoyev Oliy Majlis va O‘zbekiston xalqiga yo‘llagan Murojaatnomasida mamlakat rivojining ustuvor yo‘nalishlaridan biri bo‘lgan sud-huquq sohasidagi keyingi o‘zgarishlar masalasiga alohida to‘xtalib o‘tgandi. O‘shanda davlat rahbari O‘zbekistonda tergov va sud jarayonida advokatura institutining roli oshirilishini ta’kidlagan edi.
Izoh (0)