Amerika Qo‘shma Shtatlari hukumati o‘z fuqarolarini Venesuela va uning atrofiga sayohat qilmaslikka chaqirdi. Bu haqda Fox News xabar berdi.
Venesuela hozirda sayohat uchun xavflilik darajasi bo‘yicha AQSHda 4-o‘rinda turibdi. Qo‘shma Shtatlar davlat departamenti xabariga ko‘ra, fuqarolar bir qator jiddiy xavflar tufayli Venesuelaga sayohat qilmaslik haqida ogohlantirilgan.
Ushbu xavflarga noqonuniy hibsga olish, hibsdagi qiynoqlar, terrorizm, odam o‘g‘irlash, mahalliy qonunlarni o‘zboshimchalik bilan ijro etish, jinoyatchilik, tartibsizliklar va yomon sog‘liqni saqlash infratuzilmasi kabilar kiradi.
Ayni paytda Venesuela AQSH fuqarolarining noqonuniy hibsga olinishi bo‘yicha dunyodagi yetakchi davlatga aylangan.
2019-yil mart oyida davlat departamenti AQSHning Karakasdagi elchixonasidan barcha diplomatik xodimlarni chaqirib olgan va faoliyatini to‘xtatgan. Bu Venesuelada AQSH konsulligi mavjud emasligini va AQSH hukumati Venesueladagi fuqarolariga odatiy yoki favqulodda konsullik xizmatlarini ko‘rsata olmasligini anglatadi.
“Venesuela politsiya va xavfsizlik kuchlari demokratiyani qo‘llab-quvvatlovchi yoki tuzumga qarshi namoyish ishtirokchilariga qarshi ko‘zdan yosh oqizuvchi gaz, qalampir spreyi va rezina o‘qlardan foydalangan. Bu hol ba’zan talonchilik va vandalizmga aylanib ketmoqda”, deb yozgan Fox News.
“Sayohatchilar Venesuelada tibbiy yordam, ayniqsa, retseptsiz beriladigan dorilar cheklanishini hisobga olishlari lozim. Mamlakatning Kolumbiya, Braziliya va Gayana bilan chegaradosh hududlaridan qoching. Bu hududlarda Kolumbiya terroristik guruhlari faoliyat yuritadi. Agar Venesuelaga sayohat qilishni tanlasangiz, AQSH sizga yo‘qolgan, o‘g‘irlangan yoki muddati tugagan sayohat hujjatlarini tiklashda yordam bera olmaydi. Hozirda Venesuelada bo‘lgan har qanday AQSH fuqarosi zudlik bilan jo‘nab ketishi tavsiya etiladi”, deb murojaat qilgan AQSH davlat departamenti.
Izoh (0)