AQSH hukumati 2-avgust kuni Velesueladagi saylovda amaldagi prezident Maduroga muxolif sifatida o‘z nomzodini qo'ygan Edmundo Gonzalesni prezident sifatida tan oldi. Bu haqda Reuters nashri xabar berdi.
Manbada aytilishicha, Qo‘shma Shtatlar Venesuela prezidenti Nikolas Maduroning raqibi va muxolifat nomzodi Edmundo Gonzalesni prezident deb eʼlon qilgan hamda saylovda yutib chiqqani bilan tabriklagan. AQSH rasmiylari Gonzalesni mamlakat aholisining katta qismi qo‘llab-quvvatlagani, u shubhasiz mamlakat rahbari bo‘lishi kerakligini maʼlum qilgan.
Oldinroq Venesueladagi saylov natijalarini hisoblash muassasalari amaldagi prezident Nikolas Maduro 51 foiz ovoz to‘plab poygada g‘olib chiqqanini xabar qilgan edi. Maduroning raqiblari esa ovozlarni sanashda ko‘zbo‘yamachilikka yo‘l qo‘yilgani, xalq Maduro uchun ovoz bermaganini aytib armiyani masalani “uzil-kesil hal qilish”ga chaqirgan.
AQSH Davlat kotibi Entoni Blinken muxolifat vakili Edmundo Gonzales saylovda yaqqol ustunlik bilan g‘alaba qozonganini bildirgan. Natijalar shaffof bo‘lishi uchun Karakasdagi maʼmuriyatdan saylov protokollarini ommaga eʼlon qilish so‘ralgan.
“Ko‘plab dalillarni hisobga olgan holda, AQSHga va eng muhimi, Venesuela xalqiga shu maʼlum bo‘ldiki, Edmundo Gonzales Urrutia Venesuelada 28- iyulda bo‘lib o‘tgan prezidentlik saylovlarida eng ko‘p ovoz olgan”, — deyiladi AQSH rasmiysi hisobotida.
Venesueladagi muxolifat ayni damda Edmuno Gonzales 90 foizdan ortiq ovoz bilan g‘alaba qozonganini daʼvo qilmoqda. Amaldagi hukumat esa Maduro g‘alabasi ifoda etuvchi yakuniy bayonotni eʼlon qilish bilan cheklanib, to‘liq tafsilotlarni oshkor qilmayapti.
AQSHning Venesuela muxolifatini qo‘llab-quvvatlashi katta ehtimol bilan Maduro hokimiyatiga yakun yasalishini anglatishi mumkin. Agar Maduro prezidentlikni saqlab qolgan taqdirda ham AQSH mamlakatga yangi sanksiyalari kiritishi mumkinligi taxmin qilingan.
“Biz Venesuelada demokratik meʼyorlarni qayta tiklash jarayonini to‘liq qo‘llab-quvvatlaymiz va xalqaro hamkorlarimiz bilan birgalikda uni mustahkamlash yo‘llarini ko‘rib chiqishga tayyormiz.
Huquq-tartibot va xavfsizlik kuchlari o‘z demokratik huquqlarini amalga oshirayotgan fuqarolarga nisbatan qo‘llaniladigan siyosiy zo‘ravonlik quroliga aylanmasligi kerak. Har qanday holatda ham fuqarolar va siyosiy nomzodlarga hujum qilishdan tiyilish kerak”, — degan AQSH Davlat kotibi Blinken o‘z bayonotida.
Izoh (0)