Фин сиёсатчилари Финляндиянинг Польша ва Болтиқбўйи давлатлари изидан бориб, пиёдаларга қарши миналарни тақиқлаш бўйича Оттава конвенциясидан чиқиш жараёнини бошлашига умид қилмоқда. Бу ҳақда “Илта-Саномат” газетаси хабар берди.
Польша ва Болтиқбўйи мамлакатлари мудофаа вазирлари пиёдаларга қарши миналарни тақиқлаш бўйича Оттава конвенциясидан чиқиш ниятини билдирган ва ўз давлатлари раҳбарларига тегишли қарор қабул қилишни тавсия этган эди.
Финляндия парламенти Мудофаа қўмитаси раиси Юкка Копра баҳорда Мудофаа вазирлиги ва ҳукумат миналар бўйича конвенцияга оид парламентда муҳокама қилинадиган таклиф тайёрланаётганини билдирган.
Шартларда айтилишича, агар мамлакат урушга жалб этилган бўлса, у конвенциядан чиқа олмайди. Агар биз келишувларга риоя қилишни истасак, ундан (Оттава конвенциясидан — таҳр.) тезроқ чиқишимиз керак. Шунда, агар вазият шунчалик ёмонлашиб уруш ҳолатига тушиб қолсак, келишувларни бузишга мажбур бўлмаймиз, дейди Копра.
Ўрмон ва қишлоқ хўжалиги вазири Сари Эссая ҳам Финляндиянинг Польша ва Болтиқбўйи давлатлари изидан бориб, конвенциядан чиқишга қарор қилишига умид билдирган.
Финляндия мудофаа кучлари қўмондони Янне Яаккола аввалроқ “хавфсизлик вазияти сезиларли даражада ўзгаргани” сабабли Оттава конвенциясидан чиқиш масаласини кўтарган. Мудофаа вазири Антти Хяккянен кейинроқ Мудофаа вазирлиги ҳисобот тайёрлаётганини, унда вазирлик мамлакатга пиёдаларга қарши миналар керакми ёки йўқлигини тушунтиришини маълум қилди.
Оттава конвенцияси пиёдаларга қарши миналардан фойдаланиш, тўплаш, ишлаб чиқариш ва ўтказишни тақиқлайди ҳамда уларни йўқ қилишни талаб этади. У 1997 йил 3 декабрда Канаданинг Оттава шаҳрида имзоланган ва 1999 йил 1 мартда кучга кирган. Конвенцияга 163 мамлакат қўшилган.
Изоҳ (0)