Тошкентдаги “Ғойиб ота” қабристони гўркови Ҳожиакбар Фозилов YouTube’даги “Дарё медиа” каналига берган интервьюсида бу касбни танлашининг сабаблари ва фаолияти давомида уни ажаблантирган воқеалар ҳақида гапирди.
— Бу касб танланмайди. Аллоҳ юқтирмаса, ҳеч ким гўрков бўлолмайди. Отам раҳматли 2002 йили оламдан ўтганларидан эндигина 12 ёшли болакай эдим. Қабрлари “Чиғатой” қабристонида. Отамни соғинганда қабристонга борардим, у ерларни тозалаб юрардим. У ердаги Қобил ва Қудрат исмли гўрковлар ўзларига яқин олиб, иш ўргатишган. Бир-икки марта қабр қазишга ёрдам берганимдан кейин кўнглимда бу касбга нисбатан меҳр пайдо бўлган.
Болалигимда қабристоннинг ёнидан ўтишга қўрқадиган бола бўлганман. Бу иш билан шуғулланишим акаларимга ҳам ёқмаган. “Бу ишни қилмасин”, деб танбеҳ ҳам беришган. Аммо ҳар ким қўлидан келган ишни қилади. Шу кунгача ўзимни бир нечта соҳаларда синаб кўрганман: қассобга шогирд тушдим, савдо-сотиққа ҳам аралашиб кўрдим. Аммо ҳеч бирида ўзимни тополмадим.
13 ёшда устозларга ёрдамлашишни бошлаган бўлсам, 15 ёшимда мустақил қабрни қазиганман. Танам бақувват бўлгани ва ихлосим баланд бўлгани учун қийинчилиги сезилмаган.
Илгари вақтларда одамлар гўрковга қиз беришмаган, бу касб эгаларига жуда паст назар билан қарашган. Ҳозирги кунга келиб гўрковлик ҳам энг яхши касблардан бири ҳисобланади. Тўғри, қора иш, аммо одамларнинг мушкулини осон қилади. Диндан хабари бор инсонлар бу касб машаққати ва зарурлигини яхши билишади, дейди гўрков Ҳожиакбар Фозилов.
Қаҳрамонимиз фаолияти давомида англаб етган ҳақиқатлари ва қабристондаги сирли воқеалар ҳақида гапирди
— Феъли тор инсоннинг ҳар соҳада иши битиши қийин. Масалан, уй қурдирмоқчи бўлса, усталар “шунча ҳаракат қиляпмиз, нега битмаяпти” дейишади. Ҳатто уйингизга келса ҳам нималардир ўзгариб кетади. Бу ҳаётда феъл-атвор ҳам муҳим аҳамиятга эга. Имкон қадар очиқ кўнгил бўлиш ва атрофдагиларга зарари тегмайдиган бўлиш керак. Дилхиралик билан ҳеч ким барака топмайди.
Яқинда бир йигитни бувисининг ёнига қўйдик. У ўз жонига қасд қилиб, оламдан ўтган экан. Ер ковлаётганимда бувисининг қабри олдидаги арчада ипга боғланиб илиб қўйилган қулфга кўзим тушди. Уни олиб, укасига бердим. “Охири акамнинг бошига етишибди-да”, деди. Афсуски, мана шундай воқеалар ҳам бўлиб туради. Ҳасад сабаб инсонлар бир-бирларга ёмонлик қилишганини ва оғир гуноҳга ботишганини билмай қолишади. Шундай инсонлар борки, рўзғорига пул топмаса ҳам бундай жирканч ишларни қилишга маблағ топишади, дейди гўрков.
Ҳожиакбар Фозилов қандай инсонларга қабр қазиётганда руҳан қийналиши ҳақида гапирди
-VU-ye5e5.jpg)
— Ёш болаларга қабр қазиётганда қийналаман. Ўтган йили 12 ёшли болани тупроққа қўйдик — боши билан йиқилиб, жиддий жароҳат олган экан. Уни кўриб, фарзандларим ҳақида ўйладим. Яратгандан ҳеч бир ота-онани фарзанд доғи билан синамаслигини сўрадим. Чунки инсон қўлидан моли кетса, чидайди, аммо кўз олдида боласини сўлишига қараши жуда оғир. Яқинда 8 ойлик гўдакни олиб келишди. 4-5 ёшли ака-опалари олма еётганда, болакай ҳам бер деб сўраган. Иккитагина тиши бор экан, олмадан бир бўлак тишлаган-у, тиқилиб қолган. Болакай бақувват ва шу қадар ширин эдики, қараб кўз тўймасди.
Кейин ёш болаларнинг етим қолгани кўриш ҳам жуда оғир. 3-4 йил аввал эр-хотин кетма-кет бир ярим йил ичида вафот этишди. Уларнинг икки фарзанди бор экан, отасини ерга қўяётганда ҳам, онасининг юзига тупроқ тортаётганида ҳам нима бўлганлигини тушунишмади. Ҳар гал шу қабрлар олдидан ўтаётганда, болаларнинг аҳволи нима кечаётган экан, деб ўйлаб қоламан, дейди гўрков Ҳожиакбар Фозилов.
Қаҳрамонимиз одамларнинг қабр зиёратига бўлган муносабати анчайин ўзгаргани ҳақида куюниб гапирди
-GP5f6I5r.jpg)
— Афсуски, кўпчилик ҳамюртларимизнинг қабристонга бўлган муносабати анча ўзгарди. “Ғойиб ота” қабристони 5 гектар майдонни эгаллаган, бу ерда 11 мингдан зиёд қабр бор. Тахминан олганда, ўша қабрларнинг икки мингтасидан хабар олинади. Қабристонни ободонлаштириш учун 5 та ходим бириктирилган, йилига ҳисоблаганда бор-йўғи 3 марта битта қабр атрофида тозалай олади. Олайлик, уйингизнинг деразасини бир ҳафта очиб қўйсангиз, ҳам ер чанг бўлиб кетади. Қабристонлар ҳам эътиборга муҳтож, бир парча гўштлигидан бошлаб фарзандни улғайтирган ота-ота, ўлганидан кейин болаларининг йўқлаб келишини кутишади, дейди гўрков Ҳожиакбар Фозилов.
Ҳожиакбар Фозилов фаолияти давомида қазилиши жуда қийин кечган қабрлар ҳақида гапирди
— Икки марта қабр қазишга жуда қийналганман. Анча йил аввал бир қабрни ковлашим керак бўлди, аммо ер шу қадар қаттиқлик қилганки, кўзимдан ёш чиқиб кетган. Майитнинг яқинларига ваъда берганим учун аранг ковлаганман, аммо жуда қийин кечган.
Ундан кейин яқинда шундай воқеа бўлди. Шомга тайёр бўлсин, дейишди. Аммо ҳа деганда қабр очилавермади, охири майитнинг яқинларига қўнғироқ қилсак, “Бизнинг ҳам ишимиз битмаяпти, экспертизага олиб кетишди”, деган хабарни олдим. Қабр ковлаяпмиз, аммо у ўпирилиб тушяпти ёки тупроқ умуман олинмай қоляпти. Ер юмшоқ бўлса, нега бундай бўляпти, деб ҳайрон бўлдик. Шомга дейилган қабр ярим кечаси тайёр бўлди. Қўлларим ёрилиб, қадоқ бўлиб кетди. Эртаси куни майитни олиб келишди, яқинларидан у қандай инсон эканлиги ҳақида секин сўрадим. Билсам, у инсон ҳаётлигида ичкиликка ружу қўйган инсон бўлган экан, дейди гўрков Ҳожиакбар Фозилов.
Суҳбатни тўлиқ ҳолда YouTube’даги “Дарё медиа” каналида томоша қилишингиз мумкин.
Изоҳ (0)