Ўзбекистондаги 10 та олий таълим муассасаси раҳбар ва профессор-ўқитувчилари Финляндияда малака ошириш курсларида қатнашмоқда. Бу ҳақда Олий таълим, фан ва инновациялар вазирлиги ахборот хизмати хабар берди.
Маълум қилинишича, 25 апрель–7 май кунлари вазирлик, Финляндиянинг Ўзбекистондаги фахрий консуллиги, Халқаро Нордик университети, Финландиянинг Helsinki, Jyväskylä, Kareliya ва JAMK амалий фанлар ҳамда педагогика институтлари билан ҳамкорликда таълим жараёни иштирокчилари учун малака ошириш курси ташкил этилмоқда.
Курс “Финляндия таълим тизимини ўрганишнинг ўзига хос жиҳатлари” мавзусида бўлиб, унда Ўзбекистонда 10 та педагогика олий таълим муассасасининг 25 нафар раҳбар-ходимлари ва профессор-ўқитувчилари иштирок этмоқда.
24 апрель куни Халқаро Нордик университетида ушбу малака ошириш сафаролди семинар-тренинг ўтказилиб, курс машғулотларидан кўзланган мақсад ва вазифалар, олий таълимдаги янгиланишлар, инновацион ёндашувлар ҳақида ўзаро фикр алмашилди. Шунингдек, финландиялик эксперт Петри Лоунаскопри Финландия таълим тизими ва ўқитиш методикаси бўйича маълумотлар берди.
25 апрелдан эътиборан Финландиянинг Jyväskylä университетида тренинг иштирокчилари учун 2 ҳафталик малака ошириш бошланди. Jyväskylä университети фаолияти мисолида олий таълим стандартлари, малака талаблари, ўқув режа, фан дастурлари, кредит модул тизими ва мустақил таълим, рақамлаштириш жараёнлари, ўқитиш методикаси ва интерактив методларни қўллаш каби долзарб мавзулар ўрганилмоқда.
Бундан ташқари, курс давомида дастурга мувофиқ Финландия университетлари ва мактаблари, кутубхоналарга ташриф буюрилиши, таълим муассасаларида ўқув жараёни, хусусан узлуксиз таълимда узвийликни таъминлаш, кредит модул тизими ва мустақил таълимни ташкил этиш механизмлари, таълимда баҳолаш, ўқув меъёрий ҳужжатлар, таълим стандартлари, малака талаблари, ўқув режа ва фан дастурларини ишлаб чиқиш каби долзарб масалалар юзасидан тажриба орттириши режалаштирилган.
Изоҳ (0)