Temu маркетплейси Ўзбекистонда юридик шахс сифатида рўйхатдан ўтди

Temu маркетплейси юридик шахс — Ўзбекистон Республикаси резиденти сифатида рўйхатдан ўтди. Бу ҳақда Солиқ қўмитаси матбуот хизмати хабар берди.

Аввалроқ Ўзбекистонда Temu платформасидан фойдаланиш 2025 йил 20-мартдан бошлаб чекланиши ҳақида хабар берилганди.

Вазирлар Маҳкамасининг 2024 йил 26 декабрдаги “Ўзбекистон Республикасида электрон тижорат соҳасини янада ривожлантириш чора-тадбирлари тўғрисида”ги қарорининг 2-банди билан электрон тижорат операторлари, хусусан, электрон савдо платформалари операторлари сифатида фақат юридик шахслар — Ўзбекистон резидентлари фаолият юритиши мумкинлиги белгиланган.

“Дарё” 2024 йил декабрида электрон тижорат вакиллари — Ўзбекистон “Селлерлар” уюшмаси раиси Тимур Рашидов, Uzum Market МЧЖ ХК сотувчиси Муҳаммаджон Муроджонов ҳамда иқтисодчи Отабек Бакиров билан суҳбатлашганида Temu платформасига ҳам тўхталиб ўтилганди.

Тимур Рашидов чет эл маркетплейсларида суратда ёки видеода кўрсатилган маҳсулот бошқачароқ бўлиб чиқиши мумкинлиги, аммо истеъмолчи ўзига ёқмаган товарни қайтариб бера олмаслигини айтиб ўтганди.