АҚШда 19 январдан TikTok’ни тақиқлаш кўзда тутилган қонун кучга кирди.
18 январь, шанба куни АҚШ Олий суди TikTok’ни сотишни ёки иловани мамлакатда бутунлай тақиқлашни талаб қилувчи қонунни маъқуллаганди. Бундай қарор миллий хавфсизлик ва TikTok’нинг Хитой ҳукумати билан тахминий алоқалари билан боғлиқ хавотирлар туфайли қабул қилинди.
АҚШ TikTok якшанбага ўтар кечаси ишламай қолди, унинг иловаси App Store’дан ҳам йўқолди. Америкалик фойдаланувчилар TikTok сервисига эгалик қилувчи Хитойнинг ByteDance компанияси билан боғлиқ CаpCut, Lemon8, Gauth ва Hypis иловалари ҳам ишламай қолганини айтмоқда.
Дональд Трамп президент бўлиши биланоқ (яъни 20 январда) TikTok’ни мамлакатда вақтинча тиклашга ёрдам бериши мумкинлигини билдирган. АҚШ президенти қонуннинг кучга киришини 90 кунга кечиктириш ҳуқуқига эга. Трамп NBC News телеканалига берган интервьюсида бу ҳуқуқидан фойдаланиш-фойдаланмаслигини ҳали ҳал қилмаганини айтган. У шундай қарор қабул қилса, бу ҳақда 20 январь, инаугурация куни эълон қилишини билдирган.
The Washington Post’нинг ёзишича, Трамп қонунни ўзи бекор қила олмайди. У ё Конгрессни уни бекор қилишга ишонтириши, ёки бош прокурорга гўёки бундай қонун йўқдек, уни амалга оширмасликни буюриши керак.
Изоҳ (0)