TikTok тармоғининг Сингапурдаги офисида ходимларнинг оммавий заҳарланиши рўй берди. Бу ҳақда Bloomberg нашри хабар берди.
Манбада айтилишича, TikTok платформаси учун асос ҳисобланган ByteDance Ltd. компаниясининг Сингапурдаги офисида заҳарланиш қайд этилган. Тиббиёт ходимларининг тезкор ўрганиши натижасида ҳодиса озиқ-овқатдан келиб чиққани аниқланган.
Сингапурнинг Straits Times газетаси хабарига кўра, 30 июль куни ишчилар қорин оғриғи ва қусиш аломатлари содир бўлаётгани ҳақида хабар берган. Шундан сўнг компания офиси жойлашган One Raffles Quay тижорат биноси ҳудудига ўн еттита тез ёрдам машинаси юборилган.
TikTok компаниясининг жами заҳарланган ишчилари 60 кишини ташкил этган. Улардан 57 нафари зудлик билан касалхонага ётқизилган. Дастлабки ўтказилган текширувлар беморларнинг барчаси битта жойдан овқатланганини кўрсатган.
ByteDance вакили компания вазиятни текшириш учун расмийлар ҳамда шифокорлар билан ҳамкорлик қилаётганини айтган. Тез орада барча суриштирувлар тугаши, вазият изга солиниши хабар қилинган.
“Биз ходимларимиз саломатлиги ва хавфсизлигига жуда жиддий қараймиз. Шу боисдан ҳам барча жабрланган ходимларни қўллаб-қувватлаш учун зудлик билан чоралар кўрдик. Ёрдам кўрсатиш учун фавқулодда хизматлар билан ишлаяпмиз”, дейилган компания баёнотида.
Изоҳ (0)