АҚШ TikTok ва унинг яратилиши учун асос бўлган ByteDance компанияларини судга берган. Бу ҳақда Ғарб нашрларига таяниб, Anadolu маълум қилди.
Манбада айтилишича, АҚШда баҳсли бўлган ижтимоий тармоқни мамлакат Адлия вазирлиги ҳамда Федерал савдо комиссарлиги судга берган. Бу ҳақдаги хабар 2 август куни икки ташкилотнинг расмий саҳифасида эълон қилинган.
АҚШ муассасалари TikTok ва ByteDance’ни болалар шахсий дахлсизлиги тўғрисидаги қонунларни бузишда айблаган. TikTok видеоҳостинг хизмати фаолияти қайта кўриб чиқилиши кераклиги, халқаро ҳамжамият тартиб-қоидаларига амал қилиш зарурлиги таъкидланган.
TikTok билан боғлиқ ишни ҳозирда Калифорния марказий округи суди кўриб чиқаётгани айтилган. Суд даъвогарлар мурожаатини тўла ўрганиб чиқиб, сўнгра жараёнларни бошлаши билдирилган.
“Даъво аризасига кўра, 2019 йилдан ҳозирги кунгача TikTok болаларга оддий TikTok аккаунтларини яратиш ҳамда платформада катталар ва бошқалар иштирокида қисқа форматдаги видео ва хабарлар жойлаш, кўриш ва тарқатишга атайлаб рухсат берган”, дейилади Калифорния суди хабарида.
АҚШ Адлия вазирлиги TikTok платформасининг 13 ёшгача бўлган болалар учун мўлжалланган версиясини кескин танқид остига олган. Ушбу тизимда болалар ҳам рўйхатдан ўтиш учун электрон почта манзили ва шахсий маълумотларини киритишларига тўғри келади.
Даъвогарлар TikTok раҳбариятидан платформага ота-она назорати тизимини қўшиш ҳамда катталар назоратисиз очилган вояга етмаганлар аккаунтларини ўчиришни талаб қилган. Шунингдек, шахсий маълумот йиғиш тизимини соддалаштириш таклиф қилинган.
Изоҳ (0)