AQSH Oliy sudi TikTok’ni sotishni yoki ilovani mamlakatda butunlay taqiqlashni talab qiluvchi qonunni ma’qulladi.
Bunday qaror milliy xavfsizlik va TikTok’ning Xitoy hukumati bilan taxminiy aloqalari bilan bog‘liq xavotirlar tufayli qabul qilindi, deb xabar berdi Reuters.
Sud qaroriga ko‘ra, qonun so‘z erkinligi kafolatini buzmaydi. Kongress amerikalik foydalanuvchi ma‘lumotlarining Xitoy rasmiylariga o‘tkazilishining oldini olish choralarini ko‘rish zarur deb hisobladi. 19-yanvardan boshlab TikTok ilovasini onlayn do‘konlardan yuklab olishning imkoni bo‘lmaydi.
Taqiqni qo‘llab-quvvatlagan qonunchilar TikTok’dan Xitoy Kommunistik partiyasi manipulyatsiya qilish, nazorat qilish va tashviqot tarqatish uchun foydalanishi mumkinligini ta’kidlamoqda. Oliy sud bu dalillarga rozi bo‘ldi.
170 million amerikalik foydalanadigan TikTok rahbariyati mazkur qonun so‘z erkinligiga tahdid solayotganini aytdi. Kompaniya, agar sotuv belgilangan muddatda yakunlanmasa, Qo‘shma Shtatlardagi faoliyatini to‘xtatishga majbur bo‘lishidan ogohlantirdi.
Qaror demokratlar va respublikachilar o‘rtasida bo‘linishlarga olib keldi, garchi ikkala tomon ham fuqarolar ma‘lumotlarini himoya qilishni qo‘llab-quvvatlasa ham. Oq uy TikTok amerikalik xaridorga sotilgan taqdirdagina faoliyatini davom ettirishi mumkinligini aytdi.
Donald Tramp “TikTok’ni saqlab qolishga” va’da berdi. Uning so‘zlariga ko‘ra, kelishuvlar bo‘yicha o‘zining tajribasi TikTok va AQSH rasmiylari o‘rtasida kelishuvga erishishga yordam beradi.
20-yanvar kuni inauguratsiyadan so‘ng AQSHning saylangan prezidenti Donald Tramp Adliya vazirligiga bir kun avval kuchga kirgan qonunni qo‘llamaslik haqida ko‘rsatma berishi mumkin bo‘ladi.
Izoh (0)