Россия президенти Владимир Путин Ғарб давлатлари Россиянинг мустақиллиги ва суверенитетини тан олмагани туфайли Украинага қарши кенг кўламли уруш бошланганини даъво қилди. Бу ҳақда у “Россия. Кремль. Путин. 25 йил” номли ҳужжатли фильмда маълум қилди.
Путинга кўра, Ғарб гўёки Россияни бир неча қисмларга бўлиб, “қўлга киритмоқчи” бўлган. Россия раҳбари 2007 йилги Мюнхен конференциясидаги нутқини эслади:
Россия ёки мустақил ва суверен бўлади, ёки умуман мавжуд бўлмайди. Мен бу фикрни Ғарбдаги ҳамкорларимизга етказмоқчи бўлдим. Улар эшитишди, Россияга нисбатан муносабатларини қандайдир тарзда ўзгартиришларига умид қилгандим. Аммо бу содир бўлмади. Оқибатда Украина йўналишидаги бугунги фожиали воқеалар юз берди, деди у.
Россиянинг уруш сабаблари ҳақида ўзгарувчан баёнотлари
Россия 2014 йилдаги Қрим аннексиясидан бошлаб Украинага нисбатан агрессиясини турлича баҳоналар билан оқлаб келмоқда. Дастлаб, Украинада рус тилида сўзлашувчиларнинг ҳуқуқлари бузилаётгани даъво қилинган. Кейинчалик эса Украина НАТОга қўшилса, бу Россия хавфсизлигига таҳдид солиши айтилган.
2022 йил февралидаги тўлиқ босқин арафасида Путин урушнинг асосий мақсадларини “денацификация” ва “демилитаризация” деб эълон қилган. Бироқ Украинада на фашистик тузум, на сайловсиз ҳокимият мавжуд эди.
Шунингдек, Путин бир неча бор Украина гўёки Россия ерларидан ташкил топган “сунъий давлат” эканини таъкидлаган. Бу орқали у Украина мустақиллигини шубҳа остига қўйган. Бу эса халқаро ҳуқуқ меъёрларига мутлақо зид ҳисобланади.
Изоҳ (0)