LG компанияси ўзининг ноодатий ихтироси — тўлиқ рамкасиз microLED телевизорни намойиш этди. У иккита 22 дюймли панелдан иборат бўлиб, экран яхлит кенг тасвир сифатида ишлаши ёки иккита мустақил дисплейга ажралиши мумкин.
Бундай эффект microLEDʼнинг янги архитектураси ва панелларни аниқ улаш технологияси орқали амалга оширилди. Натижада тасвир бутун бир экран каби кўринади, ҳатто яқиндан қаралганда ёки қўл билан текширганда ҳам панеллар орасида ҳеч қандай чизиқ сезилмайди.
MicroLED технологияси нафақат мукаммал қора ранглар, юқори ёрқинлик ва аниқ ранг узатилишини таъминлайди, балки чидамлилик, қизиб кетмаслик, ҳар бир пиксел ёрқинлиги ҳамда рангини алоҳида созлаш имконияти билан ҳам ажралиб туради. Бу эса умумий ёритиш технологияларига асосланган бошқа телевизорларга нисбатан аниқроқ ва реалликка яқин тасвирлар узатилишини таъминлайди.
LG бундай панелларнинг тижорат мақсадларида, масалан, исталган шакл ва ўлчамдаги ноодатий дисплейлар яратишда фойдали бўлишини таъкидламоқда. Шунингдек, уларни уйда, масалан, бир нечта панелдан иборат улкан иш мониторини йиғиш учун ҳам ишлатиш мумкин. MicroLED ишлаб чиқариш харажатлари юқорилигига қарамай, компания бу йўналишга сармоя киритишда давом этмоқда.
Изоҳ (0)