2024 йилнинг ўтган 9 ойи давомида истеъмолчилардан автомобилларни лизинг ва кейинчалик сотиб олиш шарти билан ижарага олиш билан боғлиқ масалалар юзасидан 200 дан ортиқ мурожаат келиб тушган. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси ахборот хизмати хабар бермоқда.
Айтилишича, мурожаатларнинг 80 фоизи “Умид Авто Лизинг” ва “Business Orient Аuto” МЧЖлар таркибидаги корхоналар ҳиссасига тўғри келади. Мазкур мурожаатларни кўриб чиқиш натижасида истеъмолчиларга 1 миллиард сўмдан ортиқ маблағ қайтарилган.
Мазкур корхоналар истеъмолчиларнинг пул маблағларини қисқа муддатда янги автомобиль олиб бериш ваъдаси билан жалб қилиб, ўзларининг шартномавий мажбуриятларини лозим даражада бажариш мақсадида бошқа истеъмолчилардан жалб қилинган маблағлар эвазига қоплаш ва истеъмолчилардан олинган пулларни қайтаришни бир йилдан ортиқ муддатга кечиктириш (ушлаб туриш) ҳамда шартнома шартларини ўз вақтида бажарилмаслик ҳолатларига йўл қўйган.
Қўшимча қилинишича, қўмита томонидан “Монополист компания ишлаб чиқарган Damas қулоғини ушлаб кетди. МЧЖга тўланган пуллар эса қайтариб берилмаяпти” номли мурожаат белгиланган тартибда кўриб чиқилгандан сўнг ўрганиш натижалари бўйича ахборот тақдим этилади.
Аввалроқ лизинг ва бўлиб тўлаш каби омиллар яқин келажакда автомобиль савдоси ўсишига сезиларли таъсир кўрсатишда давом этиши хабар қилинган эди.
Изоҳ (0)