Токиода ҳукмрон Либерал-демократик партия штаб-квартираси ва бош вазир қароргоҳига ҳужум қилган эркак қўлга олинди. Бу ҳақда NHK телеканалига таяниб хабар бермоқда.
Телеканал хабарига кўра, қўлга олинган шахс партия қароргоҳи кираверишига беш-олтита Молотов коктейли улоқтирган. Шишалардан бири полиция машинасига урилган. Ёнғин шу заҳоти ўчирилган, ҳеч ким жабр кўрмаган.
Шундан сўнг эркак жиноят жойидан автомашинада қочиб, Япония бош вазири қароргоҳи ҳудудига кирмоқчи бўлган. Аммо у панжарани буза олмаган. Шундан сўнг гумонланувчи қочишга уринган, аммо полиция томонидан қўлга олинган.
Гувоҳларнинг сўзларига кўра, жиноятчининг машинаси ҳукумат раҳбари қароргоҳи ёнидаги панжарага урилганидан кейин ёниб кетган. Ҳуқуқ-тартибот идоралари ходимлари автомобиль ёнидан аккумулятор, газ горелкаси ва керосин солинган идишларни топган.
ОАВ хабарига кўра, ҳужум қилган шахс 49 ёшли Ацунобу Усуда бўлиб, ҳозирча унинг ҳужум қилиш сабаблари номаълум. Усуда сўроқ пайтида сукут сақлаган. Ҳозирда криминологлар фавқулодда ҳолат юз берган жойда ишламоқда ва унинг барча ҳолатларига ойдинлик киритмоқда.
Японияда айни дамда парламент қуйи палатасига навбатдан ташқари сайловлар олдидан сайлов кампанияси давом этмоқда. 1 октябрдан бери ҳукуматни Сигеру Ишиба бошқариб келмоқда, у 27 сентябрда бўлиб ўтган ЛДП раислигига сайловда ғалаба қозонган.
Изоҳ (0)