Рақобатни ривожлантириш ва истеъмолчилар ҳуқуқларини ҳимоя қилиш қўмитаси автолизинг фирма хизматларидан фойдаланишда эҳтиёткор бўлишга чақирди.
Маълум қилинишича, ҳозирги вақтга қадар қўмитага истеъмолчилардан автомобилларни лизинг ва ижарага берувчи корхоналар томонидан шартномавий мажбуриятлар бажарилмаётгани тўғрисида кўплаб мурожаатлар келиб тушган бўлиб, улар белгиланган тартибда кўриб чиқилган.
Хусусан, ўтган йиллар давомида автомобиллар учун олдиндан тўловларни амалга оширган, бироқ белгиланган муддатда автомобиль етказиб берилмаган ёки тўланган пуллар қайтариб берилмаётган ҳолати бўйича 2000 га яқин мурожаатлар келиб тушган.
Мазкур мурожаатларнинг асосий қисми “Умид Авто Компаниэс” МЧЖ, “Oриент Авто-Лизинг” МЧЖ ва “Имкон Авто” МЧЖ, “Мега Ауто Лизинг” МЧЖ, “Авто 60-ой” МЧЖ, “Автоҳамкор 0 фоиз” МЧЖ ва бошқа корхоналар ҳиссасига тўғри келади.
Мазкур корхоналар истеъмолчиларнинг пул маблағларини қисқа муддатда янги автомобиль олиб бериш ваъдаси билан жалб қилиб, ўз мажбуриятларини бошқа истеъмолчилардан жалб қилинган маблағлар эвазига қоплаш ва истеъмолчилардан олинган пулларни қайтаришни бир йилдан ортиқ муддатга кечиктириш (ушлаб туриш) каби ҳолатларга йўл қўймоқда.
Юқоридаги ҳолатлар юзасидан “Умид ауто леасинг”, “Умид лизинг Ташкент”, “Умид ауто”, “Умид авто Ташкент”, “Умид авто лизинг”, “Мега Авто Леасин-Ҳамкор”, “Мега Авто Леасин”, “Само Риммах Авто”, “Риммах Ауто Леасин”, “Ишонч Ауто Леасин”, “Аср Ауто Леасин”, “Барака Авто Барака Business” МЧЖлар мансабдор шахсларига нисбатан жиноят ишлари қўзғатилган.
“Бироқ бугунги кунда ушбу каби корхоналар мансабдор шахслари томонидан истеъмолчиларни чалғитиш ёки ишончни суиистеъмол қилиш йўли билан пул маблағларини жалб қилиш каби ҳуқуқбузарликларни давом эттирмоқда ҳамда улар фаолияти устидан истеъмолчилардан кўплаб шикоят аризалари келиб тушмоқда.
Қолаверса, “Авто 60-ой” ва “Автоҳамкор 0 фоиз” каби аҳолининг миллардлаб пулларини ўзлаштирган автолизинг фирмалар ҳақида жуда кўп марта гапирилган бўлса-да, айрим фуқароларимиз ҳамон бундай фирмалар алдовига ишонмоқда”, — дейилади хабарда.
Қўмита автолизинг фирмалар билан шартнома тузиш (имзолаш) ва уларга пул тўлашдан аввал шартнома шартлари билан, унда тўловларнинг талаблари ва муаммоли вазиятларда унинг қайтариб олиш муддати ва шартлари билан яхшилаб танишиб чиқишга, фирма ишончлилигини ахборот манбааларидан текширишга, ҳар қандай алдов ва ваъдаларга ишонмасликка чақирди.
Изоҳ (0)