Ўзбекистон президенти Шавкат Мирзиёев 3 апрель куни “Марказий Осиё — Европа иттифоқи” биринчи саммити доирасида Европа комиссияси президенти Урсула фон дер Ляйен билан суҳбат ўтказди.
Президент матбуот хизматининг маълум қилишича, унда Ўзбекистон ва ЕИ ўртасидаги ўзаро манфаатли ҳамкорликни янада кенгайтириш истиқболлари юзасидан фикр алмашилди. 4 апрель куни бўлиб ўтадиган минтақалараро саммит ва иқлим форумини ўтказиш масалалари кўриб чиқилди.
Европа комиссияси президенти Урсула фон дер Ляйен саммитда иштирок этиш учун 2 апрель куни Ўзбекистонга келганди. Еврокомиссия Самарқандда бўлиб ўтадиган “Европа иттифоқи—Марказий Осиё” саммитини Европа иттифоқининг чет эл ҳамкорлари билан савдо алоқаларини хилма-хиллаштириш стратегияси доирасида АҚШ божхона тўловларига Европанинг жавоби элементларидан бири сифатида кўрмоқда. Бу ҳақда Еврокомиссия раҳбари Урсула фон дер Ляйен Страсбургдаги Европарламент сессиясида айтиб ўтганди.
“Марказий Осиё—Европа иттифоқи” биринчи саммити ҳақида
Ушбу саммит Самарқанд шаҳрида 3—4 апрель кунлари бўлиб ўтади. Шавкат Мирзиёев раислигида ўтадиган саммит ишида Европа кенгаши президенти Антониу Кошта, Европа комиссияси президенти Урсула фон дер Ляйен, Қозоғистон республикаси президенти Қосим-Жўмарт Тўқаев, Қирғиз Республикаси президенти Садир Жапаров, Тожикистон президенти Эмомали Раҳмон ва Туркманистон президенти Сердар Бердимуҳамедов иштирок этади.
“Марказий Осиё—Европа иттифоқи” биринчи саммитининг ишбилармонлик дастури Шавкат Мирзиёев ва Европа тикланиш ва тараққиёт банки президенти Одил Рено-Бассо билан учрашувидан бошланди. 3 апрель куни саммитда иштирок этадиган яна бир қатор делегациялар раҳбарлари билан қатор икки томонлама музокаралар ўтказилиши режалаштирилган. 4 апрель куни Марказий Осиё давлатлари ва Европа иттифоқининг асосий институтлари раҳбарлари иштирокида кўп томонлама тадбирлар бўлиб ўтади.
Изоҳ (0)