Швейцариянинг Reyl банки Ўзбекистон ва Қозоғистон собиқ президентларининг оилалари учун пул ювганликда гумонланмоқда. Журналистлар банк ва Швейцариянинг молиявий бозорни назорат қилувчи FINMA органи ёзишмаларини ўрганди.
Илгари Reyl банки Inteca Sanpaolo номи билан танилган бўлиб, ўзини бутун дунё бўйлаб бадавлат мижозларнинг ишончини қозонган “масъулиятли банк” сифатида кўрсатган. Бироқ OCCRP ва Le Monde журналистлари қўлга киритган ҳужжатларга асосан у Марказий Осиё етакчиларининг фарзандлари учун пул ювишга хизмат қилган бўлиши мумкин.
Ёзишмалар шуни кўрсатадики, Рейл банки “пул ювишга қарши курашдаги заиф томонлар” бўйича текширилган. FINMA 2023 йилда банкда текширув ўтказган ва унинг натижаларига кўра “пул ювиш хавфининг жуда юқори даражаси, шунингдек, ушбу хавфга нисбатан эҳтиёткорлик билан ёндашиш бўйича мажбуриятларни бажаришда маълум даражада бепарволик” мавжудлигини аниқлаган. Буни банкка юборилган бир нечта хатлар ва Рейл банкининг жавоблари тасдиқлайди.
Агентликнинг ўзи айблов эълон қилиш ваколатига эга эмас, бироқ бундай вазиятларда ишни Швейцария ҳуқуқ-тартибот идораларига топшириши мумкин. Шунингдек, у банк лицензиясини қайтариб олиш, ноқонуний даромадларни мусодара қилиш ва айрим банкирларга маълум соҳаларда ишлашни тақиқлаш ҳуқуқига эга.
FINMA агентлиги банкка нисбатан бундай чоралар кўргани ҳақида ҳозирча маълумот йўқ. Шунингдек, агентлик шикоят қилгани ёки бошқа мажбурий чоралар кўргани номаълум.
Reyl банки мижозлари рўйхатида Қозоғистон собиқ президенти Нурсултон Назарбоевнинг қизи Динара Кулибоева ва Ўзбекистон собиқ президенти Ислом Каримовнинг кенжа қизи Лола Каримованинг турмуш ўртоғи Тимур Тиллаев ҳам бор.
Лола Каримова ва унинг эри Каримов даврида ўзининг ҳашаматли турмуш тарзлари билан танилган. 2013 йилда BBC билан бўлган интервьюсида Лола Каримова Женевага кўчиб ўтганини айтган эди.
2012 йилда FINMA швейсариялик активларни бошқариш компанияси Фидурҳонеъни, унинг мижозлари бўлган Тиллаев ва Каримова билан алоқалари “махсус юқори” хавф туғдириши ҳақида огоҳлантирган. Икки йил ўтгач, агентлик компаниядан улар билан алоқаларни узишни сўраган. Чунки Тиллаев ва Каримовага тегишли компанияларнинг ҳисобларидаги маблағлар 190 миллион франкка ошган.
Кейинчалик Федерал молия департаменти Fidurhone таъсисчи шеригини Тиллаев билан боғлиқ ҳисобда шубҳали фаоллик ҳақида хабар бермагани учун жаримага тортган.
OCCRP текшируви шуни кўрсатдики, 2024 йил январь ойида регуляторлар Reyl Bank’ка Тиллаев ҳисобларига оид ёзувларни, шунингдек, “Ўзбекистон билан алоқаси бўлган” барча мижозлар ҳақидаги маълумотларни топширишни буюрган.
Бунга жавобан банк FINMA’га Лола Каримованинг опаси Гулнора ҳақидаги салбий хабарлар эълон қилинганидан кейин Тиллаевнинг ҳисоблари қайта кўриб чиқилаётганини маълум қилган.
Тимур Тиллаев вазиятга изоҳ бериш сўровига жавоб бермади, дейилади OCCRP суриштирувида.
Изоҳ (0)