19 январь куни Ўзбекистоннинг биринчи президенти Ислом Каримовнинг набираси, Инстаблогер Марьям Тиллаева 25 ёшни қарши олди. Бугунги кунда Instagram ижтимоий тармоғида 1 млн 200 нафар кузатувчига эга Марьям ҳақида нималарни биламиз?
Марьям Тиллаева 1999 йилнинг 19 январь куни Тошкентда тадбиркор Тимур Тиллаев ва Ўзбекистоннинг биринчи президенти Ислом Каримовнинг иккинчи қизи Лола Каримова оиласида дунёга келган. Марьямнинг Умар исмли укаси ва София исмли синглиси ҳам бор.
Марьям болалигидан санъатга қизиққан. Ота-онаси шу боис уни “Томоша” болалар ансамблига берган. Марьям “Томоша”да фортепиано чалишни ҳамда қўшиқ куйлашни ўрганган. У бир нечта давлат тадбирларида “Томоша” гуруҳи билан саҳнага чиққан.
Марьям улғайгач, онаси Лола Каримованинг хайрия фонди лойиҳалари доирасида меҳрибонлик уйлари, мактаб ва касалхоналарга борарди. 14 ёшга тўлганида ота-онаси уни АҚШнинг Лос-Анжелес шаҳрида жойлашган мактабга ўқишга юборади. Марьям мактабни битиргач, АҚШнинг нуфузли университетларидан бирига кириб сиёсатшунослик ва ҳуқуқшунослик йўналишида таҳсил олди.
АҚШда Майкл Жексоннинг фарзандлари билан бир мактабда ўқигани
“АҚШдаги мактабда ўқиганимда, ўшанда 14 ёшда, ўтиш даврида эдим. Менга у ер ёққан. Дўстларим ўқийдиган мактабга бордим. Умуман олганда, бошқа-бошқа дунёқарашлар, болалар, мен маданиятнинг кўп қисмини шу ердан ўргандим. Мен ўқиган мактабда жуда кўп машҳурларнинг фарзандлари ўқир эди, масалан Майкл Жексоннинг фарзандлари ва яна бошқалар. Ота-онам мени машҳурларнинг уйига ташлаб кетган ва шу орқали улар билан яқиндан танишишни истаган. Укам актриса Ҳелли Беррининг қизи билан дўст бўлган.
Голливуд юлдузи Энтони Ҳопкинс билан бир фильмда рол ижро этгани
“Энтони Ҳопкинс билан бир фильмда рол ижро этганман. Атиги бир дақиқалик эпизод бўлган. Менинг бир дўстим бор, режиссёр, исми Матео. У менга ўзимни актрисаликда синаб кўришим ҳақида гапирган.
Марьямни асабийлаштирадиган савол
TikTok фойдаланувчиларидан бири Марьямдан “Халқнинг пули қаерда?”, деб сўради. Марьям эса унга жавобан: “Мен ота-онамнинг пулини ишлатмайман, мен пулни ўзим ишлаб топаман. Шунчаки моддий имконияти саёҳат қилишга етадиган дўстларим билан дам оляпман. Уларнинг пули меҳмонхонада тунашга ҳам, кемада сайр қилишга ҳам етади.
Бунинг нимаси тушунарсиз? Балки, мен саёҳат қилишга қурби етадиган йигитлар билан дўстлашгандирман? Бу мени асабийлашишга мажбур қиладиган савол”, — дейди Марьям Тиллаева.
Бобосининг сўнгги кунлари ҳақида
— Унинг сўнгги кунларида бувим, ойим ва мен ёнларида бўлганмиз. Отам ўшанда укам ҳамда синглим билан Лос-Анжелесда қолганди. Бобомнинг ўлимидан сўнг бир ҳолат кўз ўнгимда қолиб кетган. Шифокор унинг юраги уришдан тўхтаганини айтганида, ҳаммамиз у ётган хонага югурганмиз. Зинадан тушиб борар эканмиз, саросимадан бувим ва онамнинг оёқларидаги шиппаклар отилиб кетган. Мен ўшанда хонага кирганимда бобомнинг ёнида узоқ йиллар бирга бўлган кучли, кап-катта, бақувват эркаклар юракдан йиғлаётганини кўрганман. Бу ҳолат мени қаттиқ таъсирлантирган. Шундан сўнг мен Ўзбекистонга қайтмадим. Бобом билан ўртамизда жуда катта ришта бор эди.
Марьямни Ўзбекистонга танитган воқеа
2021 йилда ўзбек ОAВда Марьям Тиллаева ҳақида хабарлар тарқала бошлади. Бунга унинг россиялик блогер Амиран Сардаровга турмушга чиққани сабаб бўлди. Амиран ва Марьям 2021 йилнинг апрель ойида Лас-Вегасдаги меҳмонхоналардан бирида кичик даврада тўй қилиб, турмуш қурди.
Марьям ўзидан 13 ёш катта блогерга ота-онасининг қаршилигига қарамай турмушга чиқади. Тимур Тиллаев ва Лола Каримова қизларининг бу ишидан хафа бўлиб, тўйдан кейин у билан гаплашмай қўйган. Орадан кўп ўтмай Амиран Сардаров Instagram саҳифасига рафиқасининг ички кийимсиз суратини жойлади. Бу Марьямнинг ўзбек аудиторияси томонидан хейтга учрашига сабаб бўлди. Минглаб инсонлар унинг Instagram саҳифасига обуна бўлиб, ҳақоратомуз сўзларни ёзиб қолдира бошлади, ижтимоий тармоқлар фойдаланувчилари уни ахлоқсизликда айблади. Марьям яқинда берган интервьюларидан бирида аслида бу ҳолат унинг тушкунликка тушишига сабаб бўлса-да, бошқа томондан ўша пайтда унинг Instagram кузатувчилари сони кескин ортишига сабаб бўлгани ҳақида айтиб ўтган.
Марьям яланғоч сурати тарқалиши ортидан қаттиқ депрессияга тушиб қолгани ҳақида шундай деган эди:
— Мен бундай суратимни ҳеч қачон ижтимоий тармоққа жойламаган бўлардим, розилик ҳам бермаганман. Бироқ сен ҳар кунлик манипуляция ҳамда таҳқирлашга асосланган муносабатларда бўлсанг, сен инсоннинг “севгиси”ни йўқотмаслик учун, уни ранжитмаслик учун ҳамма нарсага тайёр бўласан. У 35 ёшида, онгли равишда шундай ўйин ўйнади. Амиран ижтимоий тармоқлар шундай ишлайди, деди. “Сен ҳеч нарсани тушунмайсан”, деди. Бу хайп, мен уни қўллаб-қувватлашим кераклигини айтди, “Буни иккимиз учун қиляпман”, деди.
Мен йиғладим. Ҳозир эса шу ҳақда ўйлаб, ўзимни шунчалик ерга урганимдан афсусланиб кетяпман. Унинг постидан кейин менга тасаввур қилиб бўлмайдиган нафрат ёғилди. Мени фоҳиша деб аташди, ўлим тилашди, таҳдидлар бўлди. Ўша расмни Ўзбекистонда яшайдиган ҳамма кўрди, уни қариндошларим, бувиларимга кўрсатишди. Бу — мен ҳаётимнинг охиригача шу шармандалик билан яшашга тўғри келадиган ҳолат.
Эримнинг бу қилмишидан сўнг уни тушунмай қолгандим, бироқ уни севганим учун қўллаб-қувватлаб, фақат ўзимга ёмон қилардим. Оилам олдида, отам, онам, укам, синглим, бобом, бувим ва халқимиз олдида уятга қолдим. Шунда ҳам Амиран тараф бўлдим. Ўшанда ақлим қаерда эди, тушунмайман. У ўшанда биргина пости билан ота-онам билан муносабатларимга бутунлай нуқта қўйди. Уларни тушунаман. Амиран ниятига етди. Мени оилам ва дўстларимдан ажратиб қўйди. Мен эса ўшанда ўзим тушунмаган ҳолда жуда қаттиқ депрессияга тушиб қолдим.
Марьям ва Амираннинг турмуши 10 ой давом этди. Ажрашгани ҳақидаги маълумотни биринчи бўлиб Амиран Instagram саҳифасида эълон қилди. Марьям эса бу ажримни қуйидагича изоҳлади:
— Мен бир ярим йил бу инсон билан яшаб, қандай кунларни бошдан кечирганимни ҳаммага сўзлаб бермоқчи эмасман. Бугун қандай ҳис-туйғулар билан яшаётганимни ҳам бўлишмайман. Агар бошимдан нималар ўтганини билсангиз, шокка тушиб, менга раҳмингиз келган бўларди. Мен ўзимга ачинишларини хоҳламайман. Шунинг учун кўрган-кечирганларимни фақат яқин дўстларимгина билади. Улар ёрдамга муҳтож пайтим мени қўллаб-қувватлади. Мен ҳақиқат тарафман, одамлар аслидан кўра яхшироқ кўриниш учун ёлғонлар тўқиб чиқаришига қаршиман.
Мен Москвага ўша инсонни севганим, у билан кейинги ҳаётимни қуришни истаганим учун кўчиб ўтгандим. Ёш бўлганим ёки нимагадир тайёр бўлмаганим айрилишимиз сабабчиси эмас. Бу инсон ҳақида ёмон гапиришни истамайман, бизнинг ажрашишимизга менга ўтказилган руҳий ва жисмоний босим сабаб бўлди. Бундан ташқари, мен гапиришни истамайдиган бошқа сабаблар ҳам бор. Ҳали ўзимга келолмадим, бунинг учун психолог билан узоқ муддат ишлашим керак.
Мен содда ва аҳмоқ бўлган эканман. Шунинг учун ҳам бошимдан ўтганларга қайсидир маънода ўзим ҳам сабабчиман. Осмонда учиб юрган эканман. Шуни айтишим керакки, болалигимда мактабда жуда кўп таҳқирлашларни бошдан кечирганман. Мусулмон бўлганим учун бошимни унитазга тиқишлар, ҳақоратларни кўрганман, калтакланганман. Аммо мен бир ярим йиллик турмушимда кўрганларимни ҳатто душманимга ҳам раво кўрмайман. Бу ҳақда гапириш жуда қийин, сабаби оилам, менга яқин инсонларим ва ўзим азият чекдим. У инсондан бундан кейин мени, оиламни, бувимни умуман тилга олмасликни сўраган бўлардим
“Ҳеч қачон ўзбекистонлик йигит билан учрашмайман, дердим”
Марьям Тиллаева яқинда берган интервьюларидан бирида ҳозирда ўзбек миллатига мансуб йигит билан учрашаётгани ҳақида сўзлаб берди.
— Ҳозирги йигитим ўзбек. У ўзбекистонлик. Мен ҳеч қачон ўзбекистонлик йигит билан учрашмайман, дердим. Чунки мен Европада ўсганман ва менталитетимиз фарқ қилади, дердим. У бойваччанинг боласи эмас. Жуда кўп ишлайди, у ғирт ўзбекча гапиради, шунинг учун рус тилида бир оз аксент билан гапиради. Шунинг учун мен ҳозир ўзбекчани ўрганишга ҳаракат қиляпман. У билан ўзимни жуда ҳам хотиржам ҳис этаман. У билан тенгдошмиз, мендан 10 кунлик катта. Унинг ойлиги мен Instagram’да топадиган бир кунлик реклама пулимдан камроқ. Лекин бу жуда катта аҳамиятга эга эмас. Мен Нью-Йоркда бўлган пайтим, у ҳар куни менга гулдаста жўнатди, бу жуда ёқимли эди. Ўзбекистонда мазам қочганида соат 3 да келиб мени шифокорга олиб борди. Бу нарсалар пулдан ҳам муҳимроқ.
Ўзбекистондаги хейт ҳақида
— Instagram саҳифамга салбий изоҳларни жуда кўп ёзишади. Лекин ўзбек тилини яхши билмаганим учун хейтнинг 90 фоизини тушунмайман. Хейтерлар асосан очиқ суратларим учун менга “шарманда” деб ёзишади ёки “Сен бизнинг пулимиз эвазига яшаяпсан”, дейишади.
Баъзан тушунишни истасам, йигитим ёки ёрдамчимдан таржима қилиб беришларини сўрайман. Лекин бунақа нарсаларга эътибор бермайман. Ҳозирда ўзбекчани ўрганяпман. Ўз репетиторим бор. Бундан ташқари, Uzbekistan for english speakers дастурини юклаб олганман.
Рекламадан қанча даромад топади?
— Саҳифамда ўзбекча рекламалар жойлаштириш 4 минг доллар. Контент устида мен, видеограф, фотограф, ассистант, реклама менежери биргаликда ишлаймиз. Бизда рекламалар кўп. Лекин ҳамма рекламаларни ҳам саҳифамга жойламайман.
Марьям Тиллаева интервьюлардан бирида 5 та — рус, инглиз, немис, француз ва испан тилларини билиши ҳақида айтиб ўтган. Шунингдек у айни пайтда шахсий косметика брендини ишлаб чиқаришни режалаштирмоқда. Марьям хайрия ишлари билан ҳам фаол шуғулланади. У Африкада яшовчи болаларга бир неча маротаба егуликлар, ўйинчоқлар ҳамда ўқув қуроллари тарқатган.
Изоҳ (0)