Бугун, 30 январь куни Ўзбекистоннинг Биринчи Президенти Ислом Каримов туғилган кун. Бу йил Биринчи Президентнинг 81 йиллиги нишонланмоқда. UZ24 шу муносабат билан Ислом Каримов оиласи ва фаолияти ҳақидаги маълумотлар билан бўлишди.
Ўзбекистоннинг Биринчи Президенти Ислом Каримов оиласида 8 фарзанд бўлган. Уларнинг энг каттаси Меҳринисо Каримова ҳозир 98 ёшда.
Отаси: Абдуғани Каримов, 1894 йилда туғилган. Онаcи: Санобар Каримова 1902 йилда туғилган.
Ака-укалари: Меҳринисо Каримова, Омонулла Каримов, Ибодулла Каримов, Ислом Каримов, Хуршид Каримов, Икром Каримов, Қуддус Каримов, Арслон Каримов.
Рафиқаси: Татьяна Каримова
Фарзандлари: Пётр Каримов (Наталия Кучми - онаси), Гулнора Каримова, Лола Каримова (Тимур Тиллаев - турмуш ўртоғи),
Неваралари: кичик Ислом Каримов, Имон Каримова, Марям Тиллаева, Умар Тиллаев, Сафия Тиллаева.
Суратда: Абдуғани ота, Санобар ая ва уларнинг фарзандлари Моҳинисо, Омонулла, Ибодулла ва Ислом
Ислом Каримов меҳнат фаолиятини 1960 йилда Тошкент қишлоқ хўжалик машинасозлиги заводида бошлаган. 1961 йилдан 1966 йилгача В.П.Чкалов номидаги Тошкент Авиация ишлаб чиқариш бирлашмасида муҳандис, етакчи муҳандис-конструктор бўлиб ишлади.
1966 йилда Ўзбекистон ССР Давлат план комитетига ишга ўтиб, бош мутахассисликдан республика Давлат план комитети раисининг биринчи ўринбосаригача бўлган йўлни босиб ўтди.
1983 йилда Ислом Каримов Ўзбекистон ССР Молия министри, 1986 йилда Ўзбекистон ССР Министрлар Совети Раисининг ўринбосари, республика Давлат план комитетининг раиси этиб тайинланди.
1986—1989 йиллар мобайнида Қашқадарё вилоят партия комитетининг биринчи котиби, 1989 йилнинг июнидан бошлаб Ўзбекистон Компартияси Марказий Комитетининг биринчи котиби лавозимларида ишлади.
1990 йил 24 март куни Ўзбекистон ССР Олий Кенгашининг сессиясида Ислом Каримов Ўзбекистон ССР Президенти этиб сайланди.
1991 йил 31 август куни Ислом Каримов тарихий воқеа — Ўзбекистон Республикасининг давлат мустақиллигини эълон қилди.
1991 йил 29 декабрда муқобиллик асосида ўтказилган умумхалқ сайловида Ислом Каримов Ўзбекистон Республикаси Президенти этиб сайланди.
1995 йил 26 мартда бўлиб ўтган умумхалқ референдуми якунларига кўра, Ислом Каримовнинг президентлик ваколати 2000 йилга қадар узайтирилди.
2000 йил 9 январда муқобиллик асосида ўтган сайлов натижаларига кўра, Конституцияга киритилган ўзгаришларга мувофиқ, Ислом Каримов 7 йил муддатга Ўзбекистон Республикаси Президенти этиб сайланди.
2007 йил 23 декабрида муқобиллик асосида ўтган сайлов натижаларига кўра, Ислом Каримов 7 йил муддатга Ўзбекистон Республикаси Президенти этиб сайланди.
2015 йил 29 март куни муқобиллик асосида Ўзбекистон Республикаси Президенти сайлови бўлиб ўтди. Унинг натижаларига кўра Конституцияга киритилган ўзгаришларга мувофиқ Ислом Каримов 5 йиллик муддатга мамлакатнинг олий лавозимига сайланди.
Ислом Каримов суверен ва мустақил Ўзбекистонни барпо этиш, халқпарвар демократик ҳуқуқий давлат яратиш, фуқаролар тинчлиги ва миллий тотувликни таъминлаш ишига қўшган улкан ҳиссаси ҳамда бу борада матонат ва жасорат кўрсатганлиги учун «Ўзбекистон Қаҳрамони» унвони, «Мустақиллик» ва «Амир Темур» орденлари билан тақдирланган.
Шунингдек, у бир қанча хорижий давлатлар ва нуфузли халқаро ташкилотларнинг орден-медаллари билан ҳам мукофотланган.
Ислом Абдуғаниевич Каримов 2016 йил 2 сентябрда 78 ёшида вафот этди.
Бугунги кунда Тошкент, Самарқанд, Қарши шаҳарларида Ислом Каримов ҳайкали ўрнатилган. Москвада ҳам яқинда Ислом Каримов ҳайкали ўрнатилди.
Изоҳ (0)